107 ára kona og dóttir hennar létust

Lögregla í Wales er að rannsaka andlát 107 ára konu og 69 ára gamallar dóttur hennar sem fundust látnar á heimili þeirra í bænum Builth Wells í Wales.

Lík mæðgnanna fundust á heimili þeirra sl. mánudag. Sky-fréttastofan hefur eftir lögreglu að grunur leiki á að konurnar hafi látist úr kolsýringseitrun, en rannsókn á andláti þeirra er ekki lokið.

Um 50 manns deyja árlega úr kolsýringseitrun í Bretlandi og um 200 manns verða fyrir heilsutjóni af völdum þessarar eitrunar. Kolsýringseitrun á sér stað þegar kolefni eins og gas, viður, eða kol brenna við ófullkominn bruna. Ef bruninn á sér stað í lokuðu rými eyðir bruninn súrefni og loftið verður mettað af kolsýringi. Kolsýringur er ósýnilegur, bragð- og lyktarlaus og ertir ekki.

• 1 blogg um fréttina

Bloggað um fréttina

• Valgeir Hallvarðsson: Varist gas- og opinn eld í svefnrými.