Bandaríska alríkislögreglan, FBI, hefur birt myndbandsupptöku og myndir af tveimur mönnum sem grunaðir eru um aðild að sprengjuárásinni í Boston á mánudaginn. Óskar FBI eftir aðstoð almennings við að  bera kennsl á mennina.

Tvímenningarnir náðust á öryggismyndavélar í miðborg Boston, nærri vettvangi sprenginganna. Annar þeirra ber dökka derhúfu á höfði en hinn hvíta. Myndgæðin eru með ágætum.

„Einhver þarna úti þekkir þessa menn,“ hefur Boston Globe eftir rannsóknarlögreglumanninum Richard DesLauriers. Hann varar við því að mennirnir séu taldir vopnaðir og hættulegir.

Maðurinn með hvítu derhúfuna sést á myndbandsupptökunni skilja svarta tösku eftir á vettvangi örfáum mínútum áður en sprengjurnar sprungu. Talið er að sprengjurnar hafi báðar verið í svörtum töskum.

FBI sendi einnig frá sér upptökur úr öryggismyndavélum þar sem mennirnir sjást, sbr. hér að neðan: