Breivik fær ekki að stofna fasistaflokk

Norsk yfirvöld hafa hafnað beiðni norska fjöldamorðingjans Andres Behring Breivik um að fá skráðan fasískan stjórnmálaflokk í Noregi sem hann vill kalla Norska fasistaflokkinn og norræna bandalagið. Breivik er nú vistaður í einangrun í fangelsi í útjaðri Ósló höfuðborgar Noregs en hann myrti 77 manns í júlí 2011.

Fram kemur í frétt AFP að beiðninni hafi verið hafnað á þeim forsendum að nauðsynlega pappíra hafi vantað auk þess sem Breivik hefði ekki sýnt fram á að flokkurinn nyti nægs stuðnings.

Haft er eftir Mette Siri Brønmo hjá norsku félagaskránni að til þess að stofna félag þurfi í það minnsta tveir að vera í því en í þessu tilfelli sé aðeins um Breivik að ræða. Lögmaður Breivik segir hins vegar að hann ætli að gera aðra tilraun til þess að fá félagið skráð.

Þá segir í fréttinni að talsvert meira mál sé að stofna stjórnmálaflokk í Noregi en venjulegt félag en til þess þurfi 5.000 formlega stuðningsmenn. Þar með eigi flokkur rétt á greiðslum úr opinberum sjóðum.

• 1 blogg um fréttina

Bloggað um fréttina

• Ásgrímur Hartmannsson: Er ekki nóg af slíku í Noregi?