88 ára barinn til bana af handahófi

Tæplega níræður fyrrum hermaður frá Bandaríkjunum var barinn til bana af tveimur unglingsstrákum fyrir utan poolstofu í Spokane í Washington-ríki á miðvikudagskvöldið. Samkvæmt lögreglu virðist fórnarlambið hafa verið valið af handahófi og er ástæða morðsins með öllu ókunn.

Maðurinn hét Delbert Belton og var 88 ára gamall. Hann gegndi herþjónustu í Kyrrahafinu í síðari heimsstyrjöldinni og var skotinn í fótinn í orrustunni við Okinawa, en lifði af.

Á miðvikudagskvöldið var hann á leið á sína eftirlætis poolstofu, Eagles Lodge þegar ráðist var á hann og fannst hann síðar um kvöldið á bílastæði með alvarlega höfuðáverka. Hann lést af sárum sínum á fimmtudeginum.

„Þetta virðist hafa verið handahófskennt,“ sagði lögregluþjónn í Spokane. „Svo virðist sem ráðist hafi verið á hann á bílastæðinu og eru engar vísbendingar um að hann hafi þekkt árásarmennina áður en árásin átti sér stað.“

Er þetta í annað skiptið í þessari viku sem að því er virðist tilefnislaus árás táninga verður manni að bana, en tveir bandarískir unglingar voru ákærðir á þriðjudag fyrir að skjóta ástralskan hafnarboltaspilara í bakið í smábænum Duncan í Oklahoma-ríki í Bandaríkjunum af einskærum leiða.

Árásarmennirnir hafa enn ekki fundist en vitni lýsti þeim sem tveimur ungum blökkumönnum.

CNN segir frá.

• 1 blogg um fréttina

Bloggað um fréttina

• Jóhann Kristinsson: Er hægt að trúa því sem við lesum í dagblöðum?