Breska utanríkisráðuneytið rannsakar nú ábendingar um að bresk kona sem kölluð hefur verið „hvíta ekkjan“ tengist hryðjuverkaárásinni á verslunarmiðstöðina í Naíróbí.

Fréttir hafa borist af því að hvít kona með slæðu um höfuð sitt hafi hrópað skipanir á arabísku að árásarmönnunum í Westgate-verslunarmiðstöðinni. Er talið að þarna sé um að ræða Samantha Lewthwaite, ekkju sprengjumannsins Jermaine Lindsay, sem m.a. tók þátt í hryðjuverkaárás í Lundúnum 7. júlí árið 2005.

Í frétt Sky-fréttastofunnar segir að hún sé eftirlýst af stjórnvöldum í Kenía fyrir tengsl við hryðjuverkahóp.

Í mars í fyrra bárust fregnir af því að hún hefði flúið yfir landamærin frá Kenía til Sómalíu.

Fréttaritari Sky í Kenía segist hafa séð myndir af hvítri konu með vopn í verslunarmiðstöðinni.

„Við vitum að hún er á svæðinu. Hún hefur verið bendluð við margar árásir í Austur-Afríku og þeir hafa verið að reyna að hafa hendur í hári hennar,“ hefur Sky eftir fréttaritara sínum.

Hann segir þó alls óvíst að um sé að ræða „hvítu ekkjuna“.

Leiðtogi Shabab-hryðjuverkahópsins hefur neitað því að Bretar séu meðal árásarmanna.

Tengdar fréttir

Hryðjuverkaárás í Naíróbí

Staðfest með tannlæknaskýrslum

• Finna ekki hvítu ekkjuna
• Westgate opnuð á nýjan leik
• Westgate verður opnuð á ný
• Hóta árásum á Oxford stræti

» Fleiri tengdar fréttir

• 1 blogg um fréttina

Bloggað um fréttina

• Svanur Gísli Þorkelsson: Hvíta ekkjan frá Írlandi