Erlent | mbl | 18.11.2013 | 17:33 | Uppfært 18:05

Byssumaðurinn gengur enn laus

Francois Molins, saksóknari í París, sýndi ljósmyndir sem voru teknar af byssumanninum í borginni á blaðamannafundi sem lögreglan boðaði til í dag. AFP

Fjölmennt lið lögreglumanna í París, höfuðborg Frakklands, leitar nú að manni sem gekk vopnaður inn á skrifstofur dagblaðsins Liberation í dag og skaut þar starfsmann. Þá hóf hann skothríð fyrir utan höfuðstöðvar bankans Societe Generale.

Tuttugu og sjö ára gamall ljósmyndari særðist alvarlega í skotárásinni á dagblaðinu í dag, að því er segir á vef breska ríkisútvarpsins. Þar kemur einnig fram, að byssumaðurinn hafi neytt ökumann til að aka sér að Champs-Élysées-breiðgötunni. Þar yfirgaf byssumaðurinn bifreiðina og leyfði hann ökumanninum að fara.

Lögreglan segir að sami maður sé grunaður um að hafa farið inn á skrifstofur fréttastöðvarinnar BFMTV í París sl. á föstudag þar sem hann hóf einnig skothríð.

Lögreglumenn hafa í allan dag staðið vakt fyrir utan skrifstofur helstu fréttastofur borgarinnar.

Boðað var til blaðamannafundar í dag þar sem lögreglan birti tvær ljósmyndir af byssumanninn. Önnur þeirra sýndi hann úti á götu og aðra ljósmynd sem eftirlitsmyndavélar tóku af honum inni á skrifstofum BFMTV-stöðvarinnar.

Francois Molins, saksóknari í París, segir að einn byssumaður beri ábyrgð á þremur árásum í borginni og mannráninu. Hann segir að ekki sé búið að bera kennsl á manninn og enn sé óljóst hvað honum gangi til.

Hann er sagður vera á bilinu 35 til 35 ára gamall, á bilinu 170 til 180 sm á hæð og krúnurakaður.

Á föstudagsmorgun gekk byssumaðurinn inn á gestamóttöku BFMTV. Þar hóf hann skothríð og linnti ekki látum þar til skothylkið var tómt.

„Næst mun ég hæfa þig,“ sagði maðurinn við fréttastjóra sem hann hafði í hótunum við.