Ariel Sharon liggur banaleguna

Heilsu Ariel Sharon, fyrrverandi forsætisráðherra Ísraels, hefur hrakað mjög og er hann nú í lífshættu að sögn lækna. Sharon, sem er 85 ára, hefur legið í dauðadái frá árinu 2006 en nokkur líffæri hans eru nú að gefa sig, þar á meðal nýrun.

Sharon var varnarmálaráðherra á 9. áratugnum og stýrði m.a. innrás Ísraels í Líbanon. Á meðan innrásinni stóð frömdu líbanskir skæruliðar, í bandalagi við Ísraelsher, fjöldamorð á hundruðum Palestínumanna í flóttamannabúðum í Beirút.

Ísraelsk rannsóknarnefnd komst að þeirri niðurstöðu að Sharon bæri persónulega ábyrgð á fjöldamorðunum. Engu að síður var hann kjörinn forsætisráðherra Ísraels 18 árum síðar, árið 2001.

Hann fékk vægt heilablóðfall árið 2005 og annað ári síðar og hefur verið í dauðadái síðan. BBC hefur eftir lækninum Zeev Rotstein við Tel Hashomer sjúkrahúsið að lífsnauðsynleg líffæri séu nú byrjuð að gefa sig og lífi hans sé ógnað.

• 1 blogg um fréttina

Bloggað um fréttina

• Riddarinn : Fínt mál