Fyrsti kvenritstjóri landsins

Somayya Jabarti má ekki aka bifreið í heimalandi sínu en nú tekur hún við ritstjórn eins stærsta dagblaðs Sádi-Arabíu, Saudi Gazette. Verður hún fyrsta konan sem gegnir ritstjórastöðu í landinu þegar hún nú tekur við af læriföður sínum, Khaled Al Maeena. „Mig hefur dreymt um það lengi að fá að sjá konu stíga inn í hina allt of karllægu ritstjórastétt,“ sagði Al Maeena. Hann segir Jabarti hafa sýnt það í störfum sínum fyrir blaðið að hún á starfið fyllilega skilið. 

Blendin viðbrögð við ráðningunni

Margir á samfélagsmiðlum hafa hrósað blaðinu fyrir ráðninguna en ekki er enn vitað hvernig hin íhaldssama Arabíuþjóð tekur ráðningunni. Jabarti sjálf segir í viðtali við CNN að hún geri sér fyllilega grein fyrir því að það verði ekki allir sáttir við ráðninguna. „Ég á mikið verk fyrir höndum en þetta er aðeins byrjunin,“ sagði Jabarti.

Hún hóf blaðamannsferil sinn hjá fréttastofunni Arab News undir stjórn Al Maeena árið 2003. Þar vann hún sig upp í starf sem aðstoðarritstjóri áður en bæði hún og Al Maeena færðu sig um set yfir á Saudi Gazette árið 2011. Saudi Gazette er ensk-arabískt dagblað sem kemur daglega út í um 47 þúsund eintökum. 

Frelsi blaðamanna ábótavant

Jabarti á ærið verk fyrir höndum en samkvæmt upplýsingum frá Blaðamönnum án landamæra er frelsi blaðamanna í Sádi-Arabíu með því lakara sem gerist í heiminum. Samtökin hafa áður fjallað um handtökur og refsingar á þeim blaðamönnum sem fjalla um viðkvæm mál í landinu, til að mynda trúmál og réttindi kvenna. Sama dag og fréttin um ráðningu Jabarti birtist í blaðinu birti blaðið frétt upp úr ummælum talsmanns menningarmálaráðherra landsins. Hann hótaði að loka fyrir netútgáfu ákveðinna dagblaða ef þau birtu efni sem teldist móðgandi fyrir íslam.

• 1 blogg um fréttina

Bloggað um fréttina

• Wilhelm Emilsson: Óþægilegar spurningar