Sala á skólastúlkum sem var rænt í Nígeríu fyrir 22 dögum er mögulega glæpur gegn mannkyninu, segir Navi Pillay, yfirmaður mannréttindamála hjá Sameinuðu þjóðunum.

Alls var 276 skólastúlkum rænt í bænum Chibok í Borno í norðurhluta landsins. Um 50 þeirra tókst að flýja en enn eru 223 í haldi mannræningjanna. Boko Haram, samtök íslamskra hryðjuverkamanna í Nígeríu, hafa viðurkennt að hafa rænt hundruðum skólastúlkna í apríl. „Ég rændi stúlkunum ykkar,“ segir leiðtogi Boko Haram, Abubakar Shekau, í myndskeiði sem birt var í gær. Sagði hann að stúlkurnar yrðu seldar á uppboði en þær eru bæði úr röðum kristinna og múslíma. 

Pillay segir að ummæli leiðtoga Boko Haram veki þungar áhyggjur enda þýði þetta að samtökin ætli sér að selja stúlkurnar í ánauð.

Rupert Colville, talsmaður mannréttindastjóra SÞ, Navi Pillay, segir að SÞ fordæmi brottnám stúlknanna og að glæpamennirnir verði að gera sér grein fyrir því að um brot á alþjóðlegu banni gegn þrælahaldi og kynlífsþrælkun sé að ræða. Þetta geti jafnvel fallið undir glæpi gegn mannkyninu.

„Það þarf að skila þessum stúlkum strax, heilum á húfi, til fjölskyldna sinna,“ segir Colville.

Mikil reiði og örvænting ríkir í Nígeríu vegna málsins, ekki síst vegna aðgerðarleysis stjórnvalda. 

Pillay hefur ritað forseta Nígeríu, Goodluck Jonathan, bréf þar sem hún hvetur ríkisstjórn hans til þess að leggja allt í sölurnar svo stúlkunum verði skilað heilum á húfi. Eins að bæta öryggi barna í landinu. 

Naomi Mutah, áhrifakona frá Chibok, sem tók þátt í að skipuleggja mótmælagöngur í höfuðborginni Abuja í síðustu viku var í gær handtekin. Er fullyrt að það hafi verið gert að kröfu forsetafrúarinnar, Patience Jonathan. Er hún sögð hafa sakað aðgerðasinna um að hafa sviðsett mannránið til að sverta ríkisstjórnina.