Erlent | AFP | 18.5.2014 | 14:21

„Byltingin þarfnast ykkar“

Vopnaðir uppreisnarmenn stóðu vörð þegar sjálfsskipaður ríkisstjóri „Lýðveldisins Donetsk“ kallaði eftir liðsauka í dag. AFP

Leiðtogar uppreisnarmanna í Úkraínu biðluðu í dag til almennings að slást í lið með þeim í baráttunni gegn yfirvöldum í Kænugarði, og tóku sérstaklega fram að meira að segja konur væru velkomnar.

„Við höfum unnið mikla sigra og fleiri eru í vændum,“ sagði Denis Pushilin, sjálfskipaður ríkisstjóri „Lýðveldisins Donetsk“ í ræðu sem hann hélt á útifundi í borginni.

Hann sagð byltinguna þurfa fleiri sterka menn til að verja lýðveldið því borgarastríð geisaði. „Fjöldi manna fellur á hverjum degi, svo við þurfum fleiri,“ sagði hann en nefndi þó engar tölur um mannfall. Fréttir af átökum berast hinsvegar á hverju kvöldi af svæðinu.

Sameinuðu þjóðirnar sögðu í skýrslu sem kom út á föstudag að 127 hafi fallið í bardögum í austurhluta Úkraínu síðan aðskilnaðarsinnar hliðhollir Rússlandi gripu til vopna gegn ríkisstjórninni í Kænugarði í apríl.

„Varnarmálaráðherra“ Donetsk, Igor Strelkov, tók undir með Pushilin í myndbandi sem birt var á Youtube, þar sem hann kallaði eftir liðsauka.

„Ef karlar eru ekki viljugir eigum við engan annan kost en að biðla til kvenna um að ganga í okkar raðir,“ sagði hann. „En ég hefði haldið að það væru til að minnsta kosti 1000 menn viljugir til að hætta lífi sínu ekki aðeins í heimabænum, heldur einnig á fremstu víglínu,“ bætti hann við og kvartaði undan því að margir kæmu aðeins til að biðja um vopn til að vernda heimili sín.