Erlent | mbl | 27.7.2014 | 10:44 | Uppfært 20:00

Hvers vegna Noregur?

„Skæruliðar beina sjónum sínum að Noregi, sennilega vegna þeirra alþjóðlegu aðgerða sem við höfum tekið þátt í,“ segir Hemmingby. Mynd/AFP

Margir velta eflaust vöngum yfir því hvers vegna hryðjuverkamenn skipuleggi árás á Noreg. Sænskur hryðjuverkasérfræðingur segir ástæðuna mögulega vera að Noregur er sú NATO-þjóð sem auðveldast sé að ráðast á. Fleiri sérfræðingar segja svipaða sögu.

„Hryðjuverkamenn gætu litið til Noregs því þeir líta svo á að auðvelt sé að ráðast á landið miðað við önnur ríki í NATO. Norðmenn hafa tekið þátt í stríðinu í Afganistan í langan tíma,“ segir Magnus Ranstorp, sem starfar hjá sænska herskólanum.

Norðmenn eru í viðbragðsstöðu eftir að öryggisdeild norsku lögreglunnar fékk upplýsingar um að sýrlenskir hryðjuverkamenn skipulegðu árás á landið.

„Norðmenn eru hluti af NATO og í nánu samstarfi við Bandaríkjamenn. Við höfum tekið þátt í stríðinu í Afganistan í mörg ár og stöndum fyrir margt af því sem einhverjir íslamistar fyrirlíta,“ segir Per Christian Gundersen hjá norska herskólanum, en Gundersen er sérfræðingur í málefnum Sýrlands.

Cato Hemmingby, hryðjuverkasérfræðingur hjá lögregluskólanum í Noregi, segir að skæruliðar beini að öllum líkindum sjónum sínum að hinu opinbera, annaðhvort einstaklingum eða heilum ráðuneytum eða stofnunum. Annar möguleiki sé að þeir geri árás á samgöngumannvirki.

„Skæruliðar beina sjónum sínum að Noregi, sennilega vegna þeirra alþjóðlegu aðgerða sem við höfum tekið þátt í,“ segir Hemmingby.

Sjá frétt Verdens gang