Erlent | AFP | 6.9.2014 | 10:25 | Uppfært 7.9.2014 19:29

Fá 4,9 milljarða í bætur

Borgarstjóri New York Bill de Blasio AFP

Alríkisdómstóll í New York hefur staðfest samkomulag um að fimm menn sem voru ranglega dæmdir fyrir hrottalega nauðgun í Miðgarði (Central Park) fái greidda 41 milljón Bandaríkjadala, 4,9 milljarða króna, í bætur.

Mennirnir, sem eru allir þeldökkir á hörund eða af rómönskum uppruna og bjuggu í Harlem hverfinu, voru dæmdir fyrir að hafa nauðgað 28 ára gamalli konu, Trisha Meili, sem var að hlaupa í garðinum að kvöldlagi í apríl 1989, og barið hana svo harkalega að hún var nærri dauða en lífi þegar hún fannst. Meili lifði árásina af, en mundi hvorki eftir henni né árásarmanninum.

Borgarstjóri New York, Bill de Blasio, fagnaði niðurstöðunni en hver þeirra mun fá um 1 milljón dala fyrir hvert ár sem þeir þurftu að afplána. Forveri hans í starfi, Michael Bloomberg, hafði barist fyrir því að réttlætið næði fram að ganga í málinu á sínum tíma.

„Með samþykki alríkisdómara í dag getum við loksins lokið þessu máli og mennirnir fimm og fjölskyldur þeirra einbeitt sér að því að reyna að lækna sárin og halda lífinu áfram,“ sagði Blasio í gærkvöldi.

Piltarnir voru margsinnis yfirheyrðir án þess að hafa lögmenn eða foreldra sína viðstadda og voru sakfelldir þrátt fyrir miklar gloppur í málflutningi ákæruvaldsins og skort á DNA-sýnum.

Málið hefur vakið mikla athygli og var m.a. umfjöllunarefni myndarinnar „The Central Park Five“ sem sýnd var á Cannes-kvikmyndahátíðinni árið 2012.

Borgaryfirvöld hafa ekki viðurkennt að mistök hafi átt sér stað og segir lögmaðurinn Zachary Center að bæði lögreglan sem rannsakaði málið og saksóknari hafi unnið vinnu sína rétt.

Mennirnir fimm voru allir á unglingsaldri þegar þeir voru dæmdir og þurftu þeir að dúsa sex til þrettán ár í fangelsi fyrir glæpinn sem þeir frömdu ekki. Það var ekki fyrr en raðnauðgari nokkur viðurkenndi að nauðgað konunni á sínum tíma að þeir voru látnir lausir úr fangelsi.

Milljarðar í bætur