Fær styrk til að rannsaka tröll

Rannsóknarráð Danmerkur hefur ákveðið að styrkja rannsókn á tilvist neðanjarðartrölla í Borgundarhólmi. Nemur styrkurinn 2,5 milljónum danskra króna, eða 52 milljónum íslenskra króna. 

Styrkinn hlýtur Lars Christian Kofoed Rømer, doktorsnemi og kennari í mannfræði við Háskólann í Kaupmannahöfn, sem undanfarin tvö ár hefur meðal annars rannsakað athafnir drauga. Með styrknum segir Lars að hann geti nú rannsakað hin raunverulegu tengsl manna og trölla á dönsku eyjunni.

Borgundarhólmur er vel þekktur fyrir blómstrandi ferðamannaiðnað, sem byggist að mestu á þeirri trú að á eyjunni sé fjölmenn byggð neðanjarðar. Þar búi tröll sem komi aðeins út á nóttunni.

Kofoed Rømer mun heimsækja eyjuna í leit að þessum tröllum, og nota til þess hinn 52 milljóna króna styrk. „Mér finnst það heillandi hvernig sögurnar af tröllunum halda áfram að þrífast í nútímasamfélagi og mig langar til að athuga áþreifanlegar birtingarmyndir þeirra, og hvernig tröllin verka gagnkvæmt á íbúa Borgundarhólms,“ segir Kofoed Rømer í viðtali við Politiken.

Hörð gagnrýni í kjölfar niðurskurðar

Styrkveitingin hefur mætt harðri gagnrýni í Danmörku, sem glímir við niðurskurð í heilbrigðis- og félagsþjónustu. Efasemdir hafa vaknað meðal Dana um hvort rétt sé að verja peningum til rannsókna sem þessara. Stjórnarformaður rannsóknarráðsins, Peter Munk Christiansen, lýsir þó yfir fullu trausti á að rannsóknin eigi eftir að reynast nytsamleg. 

„Við trúum því að rannsóknir á efnum sem þessum eigi að fá styrki til jafns við öll önnur rannsóknarsvið. Við viljum hafa breitt yfirgrip og ekki bara eltast við það sem er vinsælt einmitt núna.“

• 1 blogg um fréttina

Bloggað um fréttina

• Halldóra Lára Ásgeirsdóttir: Fær styrk til að rannsaka tröll.