Nú hefur hún þó tilkynnt að hún verði ekki viðstödd jarðarför Charbonniers, eftir að fjölskylda hans hafnaði því að þau Bougrab væru í alvarlegu ástarsambandi. Jafnframt sagði fjölskyldan henni að halda sig fjarri. 

Laurent Charbonnier, bróðir Charbonniers, gaf út tilkynningu þar sem kom fram að fjölskyldan neitaði sambandinu og óskaði eftir því að Bougrab hætti að tjá sig eins og hún hefði gert. 

Bougrab svaraði með því að hún myndi ekki setja sig upp á móti óskum fjölskyldunnar og yrði ekki við jarðarförina. „Ég hef ekki styrkinn til að berjast. Ég er marin og sigruð,“ sagði hún. Bætti hún við að með  þessu hefði fjölskyldan neitað henni um að kveðja elskhuga sinn. „Með þessu hafa þau drepið hann í annað sinn.“

Hún hefur jafnframt sagt að sambandið hafi verið alvarlegt. Á Charbonnier að hafa hitt móður hennar og á dóttir Bougrab að hafa kallað hann „pabba“.

Nokkrir vinir parsins hafa nú staðfest fullyrðingar hennar.

Foreldrar Bougrab eru innflytjendur frá Alsír. Hún var eitt sinn ráðherra í ríkisstjórn Nicholas Sarkozys. Þau Charbonnier höfðu mjög ólíkar stjórnmálaskoðanir; Bougrab er hægrisinnuð en hann var vinstrisinnaður.