Segir þúsundir rússneskra hermanna í Úkraínu

Forseti Úkraínu, Petro Porosjenkó, sagði í dag að yfir 9 þúsund rússneskir hermenn tækju þátt í að berjast við úkraínska stjórnarherinn í austurhluta landsins við hlið aðskilnaðarsinna. Mikil átök hafa geisað á svæðinu að undanförnu.

Fram kemur í frétt AFP að ráðamenn í Rússlandi hafi hafnað því alfarið að rússneskir hermenn væru í Úkraínu. Porosjenkó sagði ennfremur að yfir 500 rússneskir skriðdrekar væru í austurhluta Úkraínu auk stórskotaliðs og brynvagna til herflutninga. Gervihnattamyndir sem teknar hafa verið á vegum Atlantshafsbandalagsins (NATO) styðja þær yfirlýsingar. Rússar segja myndirnar annað hvort falsaðar eða að rangur skilningur hafi verið lagður í þær.

Haft er eftir Sergei Lavrov, utanríkisráðherra Rússlands, í fréttinni að það sé ekki nýtt að Rússar séu sakaðir um að vera með herlið í Úkraínu. Viðbrögð rússneskra stjórnvalda séu ávallt þau sömu, að biðja um sannanir. „En þeir annað hvort vilja ekki leggja þær fram eða einfaldlega geta það ekki.“

• 1 blogg um fréttina

Bloggað um fréttina

• Páll Vilhjálmsson: ESB er í stríði, Ísland er í friði