Íslendingar henda miklu af raftækjum

Ný skýrsla United Nations University (UNU) sýnir að mannkynið hefur aldrei áður hent meira af rafvörum í ruslið en árið 2014. Alls hentum við 41,8 milljónum tonna í ruslið sem var aukning um tvær milljónir tonna frá árinu áður.

Norðmenn eru sú þjóð sem hendir mest af rafvörum í ruslið eða 28,4 kg á hvern íbúa. Í næstu sætum á eftir koma Svisslendingar og í þriðja sæti eru Íslendingar með 26,1 kg.

Þjóðir Afríku eru þær sem henda minnst af rafvörum eða að meðaltali 1,7 kg á íbúa.

Í flokki rafvara eru ísskápar fyrirferðarmestir auk þvottavéla og annarra heimilistækja.

Virði rafvaranna sem grandað er hefði verið um 52 milljarðar Bandaríkjadala ef þær hefðu skilað sér í endurvinnslu. Þar af eru í rafvörunum um 300 tonn af gulli, sem samsvarar um 11 prósentum af heildarvinnslu gulls í heiminum árið 2013, samkvæmt því sem kemur fram í skýrslunni.

• 2 blogg um fréttina

Bloggað um fréttina

• Þorsteinn Helgi Steinarsson: Hér er mikið um mikið frá miklu til mikils
• Ásgrímur Hartmannsson: Þeir sem eiga mest af rafvörum henda mest af þeim