Vill meiri samruna evruríkja

Pier Carlo Padoan, fjármálaráðherra Ítalíu, segist fylgjandi meiri samruna evruríkjanna. Vel komi til greina að koma á fót nýrri evrópskri stofnun, Evrópska gjaldeyrissjóðnum, EMF, sem myndi starfa með sambærilegum hætti og getu og Alþjóðagjaldeyrissjóðurinn.

„Myntbandalagið verður fyrr eða seinna að byggjast á sameiginlegum þáttum,“ segir hann.

„Ef það gerist ekki, þá verður myntbandalagið enn fast í miðri á.“

Hann segir aukna áhættudreifingu, bæði í efnahagslegu og pólitísku tilliti, vera af hinu góða. Það er það sem hafi styrkt myntbandalagið í gegnum árin.

Padoan er ekki sá eini sem hefur lagt til að sérstakur gjaldeyrissjóður verði settur á laggirnar. Stjórnvöld í Portúgal hafa barist fyrir því lengi. Sjóðurinn myndi fá vald til að taka við stjórn ríkisfjármála í þeim evruríkjum sem lenda í efnahagslegum vandræðum, til dæmis Grikklandi. Ríkin þyrftu því aðeins að eiga við eina stofnun, EMF, í stað þess að reiða sig á samþykki þinga í öllum evruríkjunum.

Hugmyndin að EMF var fyrst sett fram árið 2010 og studdu Þjóðverjar og Frakkar hana til að byrja með. Franco­is Hollande Frakk­lands­for­seti hefur sjálfur sagt að þau ríki Evr­ópu­sam­bandsins sem noti evr­una sem gjald­miðil eigi að koma á lagg­irn­ar sam­eig­in­legri rík­is­stjórn sem og rík­is­sjóði sem lyti lýðræðis­legu eft­ir­liti af hálfu Evr­ópuþings­ins.

• 1 blogg um fréttina

Bloggað um fréttina

• Heimssýn: Er evran Trójuhestur eða Akkilesarhæll ESB?