Erlent | AFP | 5.9.2015 | 19:43

Óttast aðkomu Rússa í Sýrlandi

Utanríksiráðherra Bandaríkjanna John Kerry ræddi hernaðinn í Sýrlandi við Sergei Lavrov, starfsbróður sinn í Rússlandi í dag. AFP

Bandarísk yfirvöld lýstu í dag áhyggjum sínum yfir þátttöku Rússa í hernaðaruppbyggingu í Sýrlandi.

John Kerry, utanríkisráðherra Bandaríkjanna, ræddi við starfsbróður sinn í Rússlandi, Sergei Lavrov í síma í dag og kom þessum áhyggjum á framfæri.

Kerry gerði Lavrov grein fyrir því að ef fréttir um þátttöku Rússa væru réttar þá geti það þýtt stigmögnun átaka þar og að fleiri saklausir borgarar týni lífi, fleiri fari á flótta og árekstur við baráttuna gegn Ríki íslams í Sýrlandi, segir í tilkynningu frá bandaríska utanríkisráðuneytinu.

Þar kemur fram að Kerry og Lavrov hafi sammælst um að ræða hernaðinn í Sýrlandi nánar á fundi sínum í New York síðar í mánuðinum.

New York Times greindi frá því að Rússar hefðu sent hernaðarráðgjafa til Sýrlands og væru að aðstoða forseta landsins, Bashar al-Assad, frekar. Til að mynda hefðu verið fluttar þangað færanlegar byggingar sem gætu hýst fleiri hundruð manns á flugvöllum landsins og eins væri búið að koma upp færanlegri flugumferðarstjórn.