Skuldar syninum yfir 600 þúsund

Hinn danski Allan Hamurkesen fann það sem honum fannst skemmtileg leið til að láta strákinn sinn, hinn fimm ára gamla Victor, vinna sér inn smá vasapening.

Allan tók Victor með á hjólaverkstæðið sitt í morgun og tók mynd af honum umkringdum hjólbörðum sem hann setti svo á Facebook-síðu verkstæðisins.

„Victor er með pabba í vinnunni. Hjálpið honum að fá vasapening. Fyrir hvert „like“ sem hann fær frá kl. 10:30 til 14 gefur pabbi honum 1 kr. Til að fara með í dótabúðina (d. fætter BR). Svo deilið deilið deilið.“

Allan lék svipaðan leik í fyrra þegar Viktor fékk einn líter af ís fyrir hver 100 „like“ og þá fór Viktor heim með sjö lítra af ís. Verkstæðið er með um 5.000 fylgjendur á Facebook og taldi Allam því að Victor myndi mest hreppa milli 2.000 og 3.000 „like“. Hann hafði rangt fyrir sér.

Klukkan tvö í dag hafði myndin fengið 33.676 „like“ sem þýðir að Victor mun eiga ansi góðan dag í dótabúðinni.

„Ég hafði aldrei í lífinu reiknað með að þetta myndi fá svona mörk „like“. Þetta var bara svona laugardagsgrín hjá okkur,“ sagði Allan í samtali við Berlingske og bætti við að líklega yrði minna úr ferðinni í leikfangaverslunina en efni Victors standa til. „Núna erum við að tala um að fara í Disneyland í staðinn.“

Allan hefur lofað að hann hyggist ekki svíkja barnið um peninginn sem samsvarar yfir 640 þúsund krónum. Hann segist ætla að millifæra peninginn og að hann muni birta kvittunina á Facebook svo allir sjái að hann standi við sitt. „Svo sjáum við til hvað peningarnir enda með að fara í.“

• 1 blogg um fréttina

Bloggað um fréttina

• Ómar Ragnarsson: Já, kominn tími á vetrardekk undir Náttfara ?