Erlent | AFP | 1.12.2015 | 14:46

„Við finnum lausn á vandanum“

Barack Obama, forseti Bandaríkjanna, sagði í dag á ráðstefnu Sameinuðu þjóðanna um loftslagsmál í París, höfuðborg Frakklands, að hann væri sannfærður um að heiminum tækist að finna lausn á hnattrænni hlýnun. Fólk þyrfti því ekki að hafa áhyggjur þrátt fyrir þá yfirvofandi hættu sem hún hefði í för með sér.

„Loftlagsbreytingar eru gríðarlegt vandamál, þetta er kynslóðavandamál,“ sagði Obama við blaðamenn í París eftir að hafa sótt ráðstefnuna. „En þrátt fyrir það eru helstu skilaboð mín þau að ég trúi því raunverulega að við munum finna lausn á þessu.“ Hins vegar yrði að bregðast hratt við vandanum ef takast ætti að sigrast á honum.

Forsetinn sagði að ef hnattræn hlýnun héldi áfram liði ekki á löngu þar til verja þyrfi stærri og stærri hluta af fjármunum ríkja til þess að takast á við vandann. Obama viðurkenndi að erfitt verk væri að skapa pólitíska samstöðu um aðgerðir í þessum efnum. Ekki síst í Bandaríkjunum. Hann væri engu að síður vongóður.