Vinsæll veitingastaður brann í Osló

Mikið tjón varð þegar gamalt hús sem hýsti vinsælan veitingastað í Grünerløkka í Osló fuðraði upp í eldi í gærkvöldi. Slökkvilið borgarinnar glímdi við eldinn í þrettán klukkustundir áður en það náði að ráða niðurlögum hans.

Húsið Neðri-Fossgarður var elsta húsið í Grünerløkka og var nýlega gert upp fyrir fimmtíu milljón norskra króna. Tilkynnt var um eldsvoða þar um kl. 18:45 í gærkvöldi en þá var veitingastaðurinn opinn. Engan sakaði þó. Hluti af þaki staðarins hrundi um kl. 21 í gærkvöldi. Það var ekki fyrr en í morgun sem slökkvistarfinu lauk.

Talið er að eldurinn hafi læst sig í loftræstikerfi staðarins út frá grilli, að því er kemur fram á vef Aftenposten.

Nýlegri hluti hússins er sagður heillegur en elsti hluti þess er hins vegar gerónýtur.

• Blogga um frétt