Erlent | AFP | 6.1.2016 | 15:24

Gætu hert refsiaðgerðir gegn Norður-Kóreu

Mynd sem ríkisfjölmiðill Norður-Kóreu birti sem á að sýna íbúa Pyongyang fagna tilkynningu um að stjórnvöld hefðu gert vel heppnaða tilraun með vetnissprengju í nótt. AFP

Vetnissprengjan sem norður-kóresk stjórnvöld segjast hafa sprengt hefur verið fordæmd af bæði bandamönnum og andstæðingum þeirra. Kínversk stjórnvöld segjast algerlega andvíg tilraunum Norður-Kóreumanna með gereyðingarvopnið. Svo gæti farið að refsiaðgerðir gegn landinu verði hertar í kjölfarið.

Ekki hefur verið staðfest að um vetnissprengju hafi verið að ræða. Erlend ríki hafa reynt að að ráða í sannleiksgildi Norður-Kóreumanna þess efnis með því að greina stærð jarðskjálfta sem mældist við sprenginguna í nótt og að mæla geislavirkni í lofti.

Óháð því hvort að um vetnis- eða atómsprengju hafi verið að ræða hafa þjóðir heims fordæmt hernaðarbrölt alræðisstjórnarinnar í Pyongyang. Kínverjar eru helstu bandamenn hennar en stjórnvöld þar segjast andvíg tilraununum og að sendiherra Norður-Kóreu verði kallaður á teppið til „alvarlegra“ samræðna.

„Við hvetjum Alþýðulýðveldið Norður-Kóreu til að halda sig áfram við skuldbindingar sínar um kjarnorkuafvopnun og að hætta öllum aðgerðum sem gætu gert ástandið verra,“ sagði Hua Chunying, talsmaður kínverska utanríkisráðuneytisins.

Ógnar öryggi á svæðinu og á heimsvísu

Eins og gefur að skilja hafa Suður-Kóreumenn brugðist ókvæða við sprengingunni. Park Geun-Hye, forseti landsins, kallar hana alvarlega ögrun en þjóðaröryggisráð þess kom saman til neyðarfundar í dag.

Shinzo Abe, forsætisráðherra Japans, tók í sama streng og sagði tilraunir Norður-Kóreumanna brjóta klárlega gegn ályktunum öryggisráðs Sameinuðu þjóðanna og grafa undan alþjóðlegu átaki til þess að stöðva útbreiðslu kjarnavopna. Öryggisráðið ætlar að koma saman til neyðarfundar síðar í dag.

Jens Stoltenberg, framkvæmdastjóri Atlantshafsbandalagsins (NATO), fordæmdi tilraunina sem hann sagði grafa undan öryggi, bæði á svæðinu og á alþjóðavísu.

Bandaríkjamenn, Rússar, Frakkar og Bretar hafa allir lýst yfir áhyggjum sínum af tilburðum Norður-Kóreumanna en þjóðirnar eiga allar fast sæti í öryggisráðinu. Matthew Rycroft, sendiherra Breta við Sameinuðu þjóðirnar, sagði í dag að unnið væri að drögum að ályktun um hertar refsiaðgerðir.

Fyrri tilraunir alræðisstjórnarinnar með kjarnavopn leiddu til refsiaðgerða af hálfu Sameinuðu þjóðanna árin 2006, 2009 og 2013.