Vantaði neðan á fætur barnsins

Par sem búsett er í ítölsku borginni Parma hyggjast fara í mál við sjúkrahúsið þar sem barnið þeirra fæddist sem og einkarekna heilsugæslustöð en það fæddist án fótleggja fyrir neðan hné. Barnið, sem er drengur, fæddist á jóladag á Maggiore di Parma sjúkrahúsinu.

Fæðingin gekk vel og barnið er að öðru leyti heilbrigt samkvæmt fréttavefnum Thelocal.it. Málsóknin byggir á því að starfsmenn sjúkrahússins og heilsugæslustöðvarinnar hafi ekki tekið eftir því á meðan á meðgöngunni stóð að neðri hluta fótleggja barnsins vantaði.

Haft er eftir lögfræðingi parsins að rannsókn sé hafin á því hverjir beri ábyrgð á málinu en hugsanlegt sé að þar komi fjölmargir heilbrigðisstarfsmenn til greina. Haft hafi verið samband við alla þá sem koma að málinu, sjúkrahúsið, einkareknu heilsugæsluna og yfirvöld.

• 1 blogg um fréttina

Bloggað um fréttina

• Ingibjörg Magnúsdóttir: Vantar neðan á fætur barns í Parma - Foreldrar ósáttir