Öldungadeildarþingmaðurinn og repúblikaninn, Ted Cruz, eyddi dágóðum tíma í að úthúða andstæðingi sínum í forvali flokksins fyrir forsetakosningarnar, Donald Trump, á fundi með fréttamönnum í gær. Hann segir að Trump sé líklegur til þess að sprengja Danmörku upp eina nóttina verði hann forseti.

Cruz sagði að Bandaríkjamenn gætu vaknað upp við það einn morguninn að ef Trump væri forseti þá hefði hann látið gera kjarnorkuárás á Danmörku.

Að sögn Cruz þarf bandaríska þjóðin á herforingja að halda ekki Twitter stjóra. Vísar hann þar til þess hversu áberandi Trump er á samfélagsmiðlum. Hann segir Trump óábyrgan og skapofsamann sem ráði verr við skap sitt heldur en barnabörn hans sem enn eru á grunnskólaaldri.

Samkvæmt frétt CNN segir Cruz að móðganir og árásir Trumps á samfélagsmiðlum verði sífellt harðari og móðursýkislegri.