Harðar ásakanir gengu á víxl
Setja bókamerki
Hart var tekist á þegar frambjóðendur repúblikana mættust í kappræðum í forkosningum Repúblikanaflokksins í nótt. Tekist var á um bandaríska utanríkisstefnu, framtíð hæstaréttar Bandaríkjanna í umræðum þar sem frambjóðendurnir voru óstýrilátir og umræðan á tjá og tundri.
Forkosningar hafa þegar farið fram í Iowa og New Hampshire. Nú beina menn spjótum sínum að Suður-Karólínu fyrir 20. febrúar, þegar næstu forskosningar fara fram.
Donald Trump, sem leiðir í skoðanakönnunum, reifst harkalega við þá Ted Cruz, ríkisstjóra Texas, og Jeb Bush, fyrrverandi ríkisstjóra Flórída, og áhorfendur tóku virkan þátt í umræðunni, annað hvort með því að baula á frambjóðendur eða klappa fyrir þeim.
John Dickerson, hjá sjónvarpsstöðinni CBS, var fundarstjóri, en hann lenti í mesta basli með að stýra umræðunni. „Við eigum í hættu á að þetta endi ofan í forarpytt,“ sagði Dickerson.
Meðal þess sem tekist var á um var andlát hæstaréttardómarans Antonin Scalia og hver ætti að taka við af honum. Umræðan í tengslum við það fór um víðan völl, m.a. var rætt um réttindi samkynhneigðra og fóstureyðingar.
Þá hét Trump því að hætta að nota ljót blótsyrði í kosningabaráttu sinni.
Marco Rubio, öldungadeildarþingmaður frá Flórída, sótti í sig veðrið í kappræðunum eftir að hafa fallið í skuggann af öðrum frambjóðendum í fyrri umræðum.
Hann reifst við Cruz um hvernig sé hægt að bæta innflytjendalöggjöfina. Rubio sagði að breyttar áherslur Cruz varðandi innflytjendamál sýndu fram á hvað hann væri óheiðarlegur.
John Kasich, ríkisstjóri Ohio, hélt áfram að leggja áherslu á jákvæð skilaboð og fordæmdi aðra frambjóðendur fyrir að stunda síendurteknar árásir á meðframbjóðendur sína.
Þá sagðist Trump vera reiðubúinn að vinna með bandaríska þinginu að því að refsa fyrirtækjum sem færa verksmiðjur og störf til Mexíkó.
Lýsa yfir stuðningi við kennara
Vatni hleypt aftur á Flateyri
Nóvemberhitametið fallið?
Hjúkrunarfræðingar skrifa undir kjarasamning
Um 170 ný störf gætu skapast
Fjögur ungbörn á spítala með RS-veirusýkingu
Við urðum að byrja upp á nýtt