Réðst á gesti veitingahúss með sveðju

Lögreglumenn í Ohio í Bandaríkjunum skutu mann til bana sem hafði ráðist á fólk á veitingastað vopnaður sveðju. 

Atvikið átti sér stað sl. föstudag í borginni Columbus. Maðurinn, Mohamed Barry, flúði í kjölfar árásarinnar og hófu lögreglumenn eftirför. Hún endaði með því að hann Barry var skotinn til bana. Hann var þrítugur. 

Fram kemur á vef BBC að fólkið sem særðist í árásinni, þrír karlar og ein kona, hafi verið flutt á sjúkrahús. Þau hlutu ekki alvarlega áverka. 

Lögregluvarðstjórinn Rich Weiner segir að árásin hafi verið tilefnislaus. Lögreglan í Columbus vinnur að rannsókn málsins ásamt alríkislögreglunni.

BBC segir að Barry hafi farið inn á veitingastaðinn fyrr um kvöldið. Þá hafi hann rætt við starfsmann og farið. Um hálftíma aftur sneri hann aftur á staðinn. Þegar inn var komið gekk hann að karli og konu sem sátu við borð skammt frá innganginum og lét til skarar skríða. 

Starfsmenn og gestir á veitingastaðnum reyndu að stöðva árásarmanninn með því að kasta í hann stólum.

Karen Bass, sem var gestur á staðnum, segir í samtali við fjölmiðla að mikil skelfing hafi gripið um sig og maður hafi legið blóðugur á gólfi staðarins. Önnur kona segist hafa flúið með börn sín yfir á annan veitingastað eftir að árásin hófst. 

Lögreglan segist hafa reynt að stöðva Barry með rafstuðbyssu en án árangurs. Lögreglumaður skaut Barry þegar hann reyndi að höggva til þeirra.

• 1 blogg um fréttina

Bloggað um fréttina

• Ásgrímur Hartmannsson: Bandaríkjamenn ganga ekki um vopnaðir