Margar hindranir enn í veginum fyrir því að samkomulag náist við Tyrki

Ráðamenn Evrópusambandsins voru varkárir í yfirlýsingum sínum í dag um það hvort samningar náist við Tyrki um að ná tökum á flóttamannastrauminn sem legið hefur til Evrópu og ítrekuðu að margrar hindranir væru enn í veginum.

Meðal þeirra hindrana sem gætu verið á að samkomulag náist eru hótanir stjórnvalda á Kýpur um að koma í veg fyrir að aðildarumsókn Tyrkja að ESB fái flýtimeðferð, auk þess sem lagaleg vandkvæði geta verið á áætlunum um að senda alla flóttamenn sem koma til Grikklands, m.a. Sýrlendinga, aftur til Tyrklands.

Evrópusambandið er klofið í afstöðu sinni til samkomulagsins við Tyrki, sem ætlað er að loka helstu flóttamannaleiðinni inn í álfuna.  En leiðtogar 28 ESB ríkja ræða innihald samkomulagsins í dag, áður en fundað verður með Ahmet Davutoglu , forsætisráðherra Tyrkja á morgun.

Verði í samræmi við evrópsk lög og Genfarsáttmálann

„Ég er hóflega bjartsýnn,“ hefur  AFP fréttastofan eftir Donald Tusk, forseta Evrópska ráðherraráðsins. Lagði Tusk áherslu á að hann væri varkár frekar en bjartsýnn og varaði við að enn ætti eftir að finna lausn á fjölda mála.

Jean-Claude Juncker, forseti framkvæmdastjórnar Evrópusambandsins, kvaðst vera „frekar bjartsýnn á að samningar náist,“ og að hann muni að sjálfsögðu vera í samræmi við bæði evrópsk lög og  Genfarsáttmálann.

Angela Merkel, kanslari Þýskalands, sagði samninginn vera fyrsta raunverulega tækifærið til að binda enda hremmingarnar.  

Drögin að samkomulaginu  gera ráð fyrir að Tyrkir geti farið ferða sinna innan ESB án vegabréfsáritunar, auk þess sem opnað er á möguleikann á að allt að því tvöfalda styrkjagreiðslur til Tyrkja vegna Sýrlenskra flóttamanna.

Ólöglegt á þessum skala

Stirð samskipti Kýpur og Tyrklands geta þó valdið vandkvæðum, ekki síður en lagaleg málefni, en Sameinuðu þjóðirnar og fjölmörg mannréttindasamtök hafa bent á fólksflutningar á þeim skala sem um ræðir séu ólöglegir.

Drögin að sam­komu­lag­inu gera ráð fyrir að  yf­ir­völd í Tyrklandi taki við öll­um ólög­leg­um flótta­mönn­um sem nú eru strandaglóp­ar í Grikklandi og að fyr­ir hvern sýr­lensk­an flótta­mann sem Tyrk­ir taka til baka verði sýr­lensk­um flótta­manni á Tyrklandi veitt hæli inn­an Evr­ópu­sam­bands­ins.

Um 40.000 flóttamenn eru núna í Grikklandi og búa  þúsundir þeirra við slæman aðbúnað í bráðabirgðabúðum við landamæri Makedóníu.

• 1 blogg um fréttina

Bloggað um fréttina

• Ívar Pálsson: Fá 78 milljón múslima áritanalaust aðgengi að Íslandi?