Erlent | mbl | 9.4.2016 | 22:39

Faðir erkibiskupsins ritari Churchill

Justin Welby, erkibiskupinn af Kantaraborg. AFP

Erfðarannsóknir hafa leitt í ljós að faðir Justin Welby, erkibiskupsins af Kantaraborg, er Sir Anthony Montague Browne, síðasti einkaritari Winston Churchill. Biskupinn hefur ávallt talið að faðir sinn væri vískísölumaðurinn Gavin Welby, sem lést árið 1977.

Móðir Welby, Lafði Williams af Elvel, hefur staðfest að hafa átt vingott við Sir Anthony skömmu áður en hún gekk í hjónaband 1955. Hún segir fregnirnar „mikið áfall“ en rámar í að hafa sængað með einkaritaranum eftir að hafa innbyrt mikið magn áfengis.

Erkibiskupinn af Kantaraborg, sem er æðsti leiðtogi anglíkönsku kirkjunnar, segist hafa uppgötvað raunverulegt faðerni sitt á síðustu vikum. Samkvæmt Daily Telegraph ákvað hann að gangast undir erfðarannsókn eftir að miðillinn setti sig í samband við hann með upplýsingar um fjölskyldu hans.

Erfðaefni úr munni biskupsins var borið saman við hár úr bursta í varðveislu ekkju Sir Anthony en rannsóknir leiddu í ljós að 99,9779% líkur væru á því að Sir Anthony væri faðir erkibiskupsins.

Charles Moore, fyrrverandi ritstjóri Telegraph, sagði að niðurstöðurnar hefðu komið erkibiskupnum verulega á óvart.

„Dagsetningarnar virtust ómögulegar þar sem hann fæddist nánast nákvæmlega níu mánuðum eftir að móðir hans giftist Gavin Welby, og því var eðlilegt að ætla að hann væri brúðkaupsferðarbarn.“

Í yfirlýsingu víkur erkibiskupinn að áfengisfíkn móður sinnar og Gavin Welby:

„Vegna fíknar foreldra minna var æska mín flókin, jafnvel þótt ég nyti blessunar og gjafar dásamlegrar menntunar, og væri ástúðlega sinnt af ömmu minni, móður minni þegar hún náði bata og föður mínum eins og hann gat.“

„Ég veit að ég finn hver ég er í Jesú Kristi, ekki í erfðunum, og persóna mín í honum breytist aldrei.“

Lafði Williams starfaði sem ritari fyrir Winston Churchill á síðustu árum hans sem forsætisráðherra. Í yfirlýsingu sinni sagði hún m.a.:

„Svo virðist sem þær ráðstafanir sem við tókum á sínum tíma hafi ekki dugað og að hinn dásamlegi sonur minn hafi orðið til vegna þessa sambands.“

Í viðtali við Telegraph sagði erkibiskupinn að uppljóstrunin hefði ekki haft áhrif á samband sitt við móður sína.

Að sögn biskupsins af Norwich, Graham James, ákvað erkibiskupinn af Kantaraborg að gangast undir erfðarannsókn til að afsanna tilgátur um faðerni hans. Niðurstöðurnar reyndust þó þvert á væntingar hans.

Erkibiskupinn starfaði sem framkvæmdastjóri hjá olíufyrirtæki í ellefu ár, en gaf upp vel launað starfið til að að læra til prests. Ákvörðunina tók hann í kjölfar þess að sjö mánaða dóttir hans lést í bílslysi.

Hann var vígður erkibiskup af Kantaraborg 2013.

Ítarlega frétt um málið má finna hjá BBC.