Erlent | mbl | 13.5.2016 | 8:56

Fær milljarða fyrir byssuna

George Zimmerman. AFP

Svo virðist sem George Zimmerman geti grætt heilmiklar fjárhæðir á því að selja byssuna sem hann notaði til þess að drepa unglingsdrenginn Trayvon Martin árið 2012 en hann setti byssuna á uppboð í gær. Fjölmargir hafa boðið í byssuna og er verðið á byssunni komið upp í rúmlega 17 milljónir Bandaríkjadali eða jafnvirði rúmlega tveggja milljarða íslenskra króna.

Drápið á Martin vakti heimsathygli. Zimmerman sagði að um sjálfsvörn hefði verið að ræða á meðan fjölskylda drengsins sagði drápið rasískt en Martin var þeldökkur. Þá vakti það einnig athygli þegar Zimmerman var sýknaður af morðinu á Martin árið 2013.

Fyrri frétt mbl.is: Segir byssuna sögulega

Byrjunarverðið á byssunni á uppboðinu var 5.000 Bandaríkjadalir og sagði Zimmerman að um sögulegan grip væri að ræða. Svo virðist sem áhuginn á byssunni sé mikill en þúsundir hafa boðið í hana.

Zimmerman var að sinna sjálfboðaliðastarfi sem nágrannavörður í afgirtu hverfi í Flórdía þegar hann skaut drenginn. Martin var óvopnaður en Zimmerman sagðist hafa elt hann því hann grunaði Martin um að tengjast ráni í hverfinu. Þá hefur hann alltaf haldið því fram að um sjálfsvörn hafi verið að ræða þegar hann skaut drenginn.

Síðan Zimmerman var sýknaður hefur hann reglulega ratað í fjölmiðla, til að mynda fyrir að selja málverk af Sambandsfánanum, sem margir litu á sem merki um rasisma, í samstarfi við skotvopnaverslun í Flórída. Þá var hann á síðasta ári sakaður um að hafa ráðist á kærustu sína sem dró málið þó til baka.

Í september 2014 hótaði hann manni í Flórída og árið 2013 kallaði fyrrverandi eiginkona hans eftir hjálp lögreglu eftir að Zimmerman hótaði henni með byssu. Hvorki hún né maðurinn kærðu Zimmerman.