Erlent | mbl | 28.5.2016 | 8:46

Átök eftir fjöldafund Trump

Lögregla handtók 35 manns vegna átakanna. AFP

Stuðningsmönnum og andstæðingum forsetaframbjóðandans Donald Trump lenti saman í borginni San Diego í Kaliforníu nú í morgun.

Lögregla hefur lýst samkomu utan við ráðstefnuhöll í borginni ólöglega og handtekið 35 manns. Samkvæmt BBC hafa bæði steinar og vatnsflöskur flogið á milli hinna stríðandi fylkinga.

Trump var í borginni, sem er nálægt landamærum Mexíkó, til að halda fjöldafund fyrir forkosningar repúblikana í Kaliforníu 7. júní. Eins og frægt er orðið hefur hann staðhæft að hann muni byggja vegg við landamærin til að halda úti ólöglegum innflytjendum.

Átökin brutust út eftir fjöldafundinn, í því sem stuðningsmenn flæddu úr ráðstefnuhöllinni og mættu andstæðingum á götum úti. Tugir óeirðalögreglumanna voru sendir á staðinn til að skilja hópana að. Nokkrir mótmælendur klifu vegg við ráðstefnuhöllina til að kasta vatnsflöskum í lögreglu.

Trump í pontu í San Diego. AFP

U.þ.b. einn þriðji hluti íbúa San Diego er af rómönsku bergi brotinn og hundruð þúsunda manna fara löglega yfir landamærin við Mexíkó á degi hverjum. Samkvæmt lögreglu urðu engar eignaskemmdir og enginn virðist hafa slasast alvarlega í átökunum.

Trump tísti til lögreglu eftir viðburðinn: „Vel að verki staðið við að taka á rustunum sem reyndu að trufla okkar mjög svo friðsamlegu og fjölmennu samkomu.“

„Það er enginn þurrkur“

Á öðrum fjöldafundi í Fresno hafði Trump lýst því yfir að það væri „enginn þurrkur“ í Kaliforníu þrátt fyrir að síðustu fjögur ár séu mesta þurrkatímabil sem ríkið hefur upplifað. Eftir að hafa rætt við bændur sem kvörtuðu yfir vatnsskorti fyrir uppskeru sína sagði hann: „Þeir skilja ekki, enginn skilur það. Það er enginn þurrkur. Þeir veita vatninu út í sjóinn.“

Segir BBC að þar virðist Trump vera að vísa til vatns sem er veitt úr Sacramento-ánni í höfn San Francisco-borgar, að hluta til í þeim tilgangi að vernda tegundir í útrýmingarhættu. Trump sagði að ef hann kæmist til valda myndi hann „byrja að opna fyrir vatnið“ og tryggja að bændur hefðu nóg fyrir uppskeru sína.

Stuðningsmenn Trump á fundinum í San Diego. AFP

Trump er eini frambjóðandinn sem kosið er um í forkosningum repúblikana til forseta í Kaliforníu og hefur nú þegar náð þeim fjölda kjörmanna sem nauðsynlegir eru til að tryggja útnefningu flokksins. Hún hefur þó ekki verið staðfest enn.

Fyrr í gær hætti Trump við að þekkjast tilboð um kappræður við Bernie Sanders, annan forsetaframbjóðanda demókrata. Sagðist Trump í yfirlýsingu fremur vilja eiga í kappræðum við hvern þann sem hlýtur útnefningu demókrata, og að það yrði líklega Hillary Clinton. Nýjustu skoðanakannanir benda til að Clinton sé um fjórum prósentustigum vinsælli en Trump.