Forseti Palestínu, Mahmud Abbas, verður viðstaddur jarðaför Shimon Peres, fyrrverandi forseta Ísrael og Nóbelsverðlaunahafa. Í jarðaförinni sem verður gerð á föstudaginn nk. mun Abbas hitta fjölmarga þjóðarleiðtoga. Þeirra á meðal verður Barack Obama forseti Bandaríkjanna. AFP greinir frá.
Íraelska varnarmálaráðuneytið segir að Abbas hafi óskað eftir því að fá að vera viðstaddur. Þetta sætir tíðindum því margir Palestínubúar hafa sýnt vanþóknun á Peres, eftir lát hans og sagt hann hafa verið „stríðsglæpamann“. Abbas segir Peres hafa verið „hugrakkan“ talsmann friðar og jafnframt sendi hann fjölskyldu Peres samúðarkveðju.
Frétt mbl.is: Peres: Hetja eða stríðsglæpamaður
Benjamin Netanyahu, forsætisráðherra Ísrael hefur óskað eftir viðræðum við Abbas. Palestínumenn segja hins vegar að áralangar viðræður við Ísraelsmenn hafa ekki bundið enda í hernám Vesturbakkans.
Viðvera Abbas í jarðaförinni markar tímamót því friðarviðræður milli Ísraels og Palestínu voru síðast í apríl árið 2014.
Shimon Peres, fyrrverandi forseti og forsætisráðherra Ísraels lést , 93 ára að aldri. Peres, sem hlaut friðarverðlaun Nóbels 1994 fékk alvarlegt hjartaáfall fyrir hálfum mánuði. Hann hafði verið á batavegi undanfarna viku, þar til honum hrakaði á ný og hann lést.