Jafnvel þó að aðildarríki Parísarsamkomulagsins standi við fyrirheit sín um að draga úr losun gróðurhúsalofttegunda dugir það ekki til að ná markmiðinu um að halda hnattrænni hlýnun innan við 2°C. Alþjóðaorkumálastofnunin (IEA) telur að hlýnunin nái 2,7°C fyrir árið 2100 með núverandi fyrirheitum ríkjanna.

Í árlegri skýrslu IEA um horfur í orkumálum heimsins kemur fram að mögulegt sé að ná þeim markmiðum sem lönd heims hafa sett sér um að draga úr losun og að það muni hægja á loftslagsbreytingum. Þau markmið séu hins vegar ekki líkleg til að halda hlýnun jarðar „vel innan við“ 2°C eins og stefnt er að í Parísarsamkomulaginu.

Stofnunin telur það nær ómögulegt að ná metnaðarfyllsta markmiði samkomulagsins um 1,5°C hlýnun, að því er kemur fram í umfjöllun New York Times.

„Umbreytingin sem þarf til að raunhæfur möguleiki sé á að haldast innan við hitastigsmarkmiðið um 1,5°C er veruleg,“ segir í skýrslunni.

Mikill uppgangur í endurnýjanlegum orkugjöfum

Góðu fréttirnar eru þó að mikill uppgangur er í endurnýjanlegum orkugjöfum í heiminum. Þannig jókst framleiðslugeta hreinnar orku meira á síðasta ári en kola, olíu og kjarnorku samanlagt. Þrátt fyrir það telur IEA að jarðefnaeldsneyti eigi enn eftir að leika stórt hlutverk í orkubúskap jarðarbúa um mörg ókomin ár, sérstaklega jarðgas sem sé að taka við af kolum í miklum mæli.

Fatih Birol, framkvæmdastjóri IEA, segir að nú sé jarðefnaeldsneyti um 81% af orkubúskap mannkynsins. Gangi landsmarkmið sem þjóðir hafa skilað inn vegna Parísarsamkomulagsins eftir verði hlutfallið komið niður í 74% árið 2040.

Framkvæmdastjórinn vill ekki tjá sig um hvaða áhrif kjör Donalds Trump sem forseta Bandaríkjanna hefur á spár stofnunarinnar. Trump hefur kallað loftslagsbreytingar „gabb“ og hótað því að draga Bandaríkin út úr Parísarsamkomulaginu. Birol segir hins vegar að stofnunin muni fylgjast náið með því til hvaða aðgerða ríkisstjórn hans muni grípa.

Frétt New York Times

Parísarsamningur

• Markmið samningsins er að halda hnattrænni hlýnun innan við 2°C miðað við tímabilið fyrir iðnbyltingu.
• Aðildarríkin stefna jafnframt að því að leita leiða til að halda hlýnuninni við 1,5°C. 
• Ætlast er til að aðildarríkin setji sér eigin markmið um samdrátt í losun.

Tengdar fréttir

Loftslagsvá

Yfir 40 billjónir til þróunarríkja á ári

• Lagt til að fátækari þjóðum verði hjálpað
• „Kæra fullorðna fólk“
• „Börn eru að upplifa holskeflu breytinga“
• Yfir 1.000 jöklar bráðnað í landinu

» Fleiri tengdar fréttir

• 1 blogg um fréttina

Bloggað um fréttina

• Ómar Ragnarsson: Vilji er allt sem þarf og þá fylgja árangur og …