Sendiherra Rússa skotinn í Tyrklandi

Andrei Karlov, sendiherra Rússlands í Tyrklandi var skotinn á listasafni í höfuðborginni Ankara í dag. Er hann alvarlega særður. Nokkrir aðrir nærstaddir særðust einnig í árásinni, en hún var gerð degi eftir mótmæli í Tyrklandi gegn afskiptum Rússlands í Sýrlandi.

Samkvæmt frétt BBC var Karlov fluttur á sjúkrahús þar sem gert er að sárum hans. Haft er eftir tyrkneskum miðlum að Karlov hafi verið að halda ræðu á safninu þegar hann var skotinn í bakið af byssumanni.

Uppfært kl 17:24:

Í frétt Guardian er sagt að byssumaðurinn hafi verið skotinn af lögreglu og vitnað í tyrknesku fréttastofuna NTV. Segir þar að hann hafi verið snyrtilega klæddur og staðið fyrir aftan sendiherrann áður en hann tók upp byssuna og skaut hann. Árásin náðist á myndband, en þar sést meðal annars að byssumaðurinn segir að ekki eigi að gleyma Aleppo og Sýrlandi. 

Árásin á Karlov átti sér stað degi eftir fjölmenn mótmæli gegn íhlutun Rússa í Sýrlandi. AFP

• 2 blogg um fréttina

Bloggað um fréttina

• Torfi Kristján Stefánsson: Lögreglumaður morðinginn
• Wilhelm Emilsson: Það sem byssumaðurinn sagði