Vill auka kjarnorkuvopnastyrk Bandaríkjanna

Verðandi forseti Bandaríkjanna, Donald Trump, vill að Bandaríkin auki kjarnorkuvopnastyrk sinn mikið á næstunni. Segir hann í færslu á Twitter að Bandaríkin þurfi að bæta við kjarnavopn sín þangað til heimurinn öðlist almenna skynsemi varðandi slík vopn.

Trump útskýrði ekki nánar orð sín, en þau eru í andstöðu við hugmyndir forvera hans, Barack Obama, sem sagði í ræðu í Prag árið 2009 að vinna þyrfti að því að eyða öllum kjarnorkuvopnum.

Trump fundaði í gær með hópi sérfræðinga í varnarmálaráðuneytinu, meðal annars yfirmanni eldflaugavarnarstofnunar Bandaríkjanna. Var umræðuefni fundarins hvernig draga mætti úr útgjöldum á ýmsum sviðum hernaðarmála.

Bandaríkin eiga í dag um 7.000 kjarnorkuvopn, en aðeins Rússland á fleiri slík vopn og munar þar nokkrum hundruðum.

• 2 blogg um fréttina

Bloggað um fréttina

• Páll Þorsteinsson: Sama hér félagi...Ég vill kjarnorkuvæða Ísland.
• Ómar Ragnarsson: "Skipulagt brjálæði " 1914. Hvað nú?