Fundu hluti í eigu Charlotte
Setja bókamerki
Hvað varð um fjölskylduna? Sú spurning brennur á mörgum Frökkum og spurningin verður æ áleitnari sem dagarnir líða. Í gær fann hlaupari fatnað og skilríki Charlotte Troadec, 18 ára, langt frá heimili fjölskyldunnar í Orvault (Loire-Atlantique). Tæpar tvær vikur eru liðnar frá hvarfi Troadec fjölskyldunnar og er málið rannsakað sem morð.
Samkvæmt heimildum AFP fréttastofunnar fann hlaupari buxur Charlotte og sjúkrasamlagsskírteini hennar í vasa á buxunum skammt fyrir utan bæinn Dirinon á Bretagne. Bærinn, sem er skammt frá hafnarbænum Brest, er í 280 km fjarlægð frá heimili fjölskyldunnar í Orvault en sá bær er rétt fyrir utan borgina Nantes í vesturhluta Frakklands. Það tekur um þrjár klukkustundir að keyra þarna á milli.
Heimildir herma að foreldrarnir, Pascal og Brigitte sem eru bæði 49 ára gömul, séu frá Brest. Þegar tilkynnt var um fundinn lokaði lögreglan leiðum inn í Dirinon og var leitað bæði á landi og úr lofti án árangurs.
Þrettán dagar eru liðnir síðan Troadechjónin hurfu ásamt tveimur börnum sínum, Sebastien 21 árs og Charlotte.
Lögreglan hóf formlega rannsókn á hvarfi þeirra á mánudag og er einnig rannsakað hvort þau hafi verið numin á brott og haldið ólöglega.
Blóðblettir hafa fundist á heimili fjölskyldunnar og er búið að staðfesta með lífsýnarannsóknum að blóðið er úr þremur af fjórum þeirra sem saknað er, að sögn saksóknarans Pierre Sennes.
Samkvæmt upplýsingum frá lögreglu fundust blóðblettir meðal annars á farsíma Sebastiens og eins armbandsúri móður hans. Greinileg ummerki eru um að reynt hafi verið að þurrka blóðið af.
Leitað var ítarlega á nýjan leik í húsinu í gær að sögn saksóknara í Nantes, Pierre Sennes. Ekkert blóð hefur fundist úr Charlotte í húsinu segir Sennes.
Lögreglan hefur lagt hald á bíla foreldranna en bíll Sebastiens hefur ekki fundist. Hvorki tannburstar né hárburstar finnast á heimilinu og eins hefur allt verið tekið af rúmum þeirra. Þegar lögregla kom fyrst í húsið fannst rúmfatnaður hangandi til þerris. Ísskápurinn var fullur af mat og eins var leirtau í eldhúsvaskinum. „Það er eins og allt lífsmark í húsinu hafi stöðvast,“ segir Sennes.
Lögregla greindi frá því 24. febrúar að Sebastien sé grunaður um að hafa gert áætlun um að taka fjölskylduna af lífi og jafnvel sitt eigið. Nágrannar og fólk sem tengist rannsókninni segir að Sebastien glími við geðræna kvilla og að Pascal hafi glímt við þunglyndi á árum áður.
Sennes hefur staðfest að Sebastien hafi hlotið dóm fyrir líflátshótanir á bloggi sínu árið 2013. Hann var þá of ungur til að hljóta fangelsisdóm en sinnti samfélagsþjónustu þess í stað.
Bekkjarfélagar Sebastiens segja hann hins vegar vera vingjarnlegan rólyndispilt sem alltaf sé tilbúinn að hjálpa öðrum.
Um 70 jarðskjálftar í kvikuganginum
Aldraðir beittir ofbeldi
Ástand Ficos stöðugt en „mjög alvarlegt“
Mannbjörg þegar strandveiðibátur sökk
„Hann var lokaður inni í bátnum“
Útlendingafrumvarpið á dagskrá á morgun