„Þegar þú drepur saklaus börn“
Guðrún Hálfdánardóttir
Setja bókamerki
Tengdar fréttir
Donald Trump Bandaríkjaforseti
Myndir af Abdul Hamid Youssef með börn sín, tvíburana Ahmed og Aiya, lætur engan ósnortin. Ekkert frekar en myndir af öðrum börnum sem köfnuðu í efnavopnaárás Sýrlandshers á bæinn Khan Sheikhun í Idlib-héraði á þriðjudagsmorgun. Donald Trump hótar einhliða aðgerðum Bandaríkjanna í Sýrlandi.
Varað er við myndefni sem fylgir þessari frétt
Abdul Hamid Youssef segir að heimurinn verði að fá upplýsingar um ástandið í heimabæ hans og hefur veitt fjölmiðlum leyfi til þess að birta myndir af honum með litlu tvíburana sem báðir létust í árásinni. Ekki bara þau því 20 úr fjölskyldu Youssef létust, þar á meðal eiginkona hans.
Ahmad og Aya voru níu mánaða gömul þegar þau létust ásamt móður sinni, Dalal, og 16 öðrum ættingjum. Þau hvíla nú í ómerktri fjöldagröf.
„Ég gat ekki bjargað þeim“
Youssef, sem er 29 ára gamall, er verslunarmaður og var farinn til vinnu þegar loftárásirnar hófust um 6.30 á þriðjudagsmorgun. Þegar eiginkona hans hringdi í hann og lét hann vita hvað hafði gerst flýtti hann sér heim. Allt virtist vera í lagi en í öryggisskyni fór hann með fjölskyldu sína niður í kjallara húss í nágrenninu ef gerðar yrðu frekari loftárásir. En klukkutíma síðar byrjuðu einkennin að koma fram.
„Fjölskyldan beið öll þarna niðri og við vorum örugg en síðan fóru þau af kafna,“ segir frændi Youssef, Alaa í samtali við Telegraph.
„Tvíburarnir fóru allt í einu að hristast og skjálfa og áttu í öndunarerfiðleikum. Síðan horfði hann á eiturefnin ná tökum á eiginkonu sinni, síðan var það bróðir hans, frænkur og frændur,“ segir Alaa.
„Allir létust niðri í kjallaranum - það gafst ekki tími til að koma þeim á sjúkrahús,“ bætir hann við. Hann segir að Youssef hafi endurtekið í sífellu: „Ég gat ekki bjargað neinu þeirra, ég gat ekki bjargað þeim.“
Hryllileg árásin snertir hjörtu flestra og einn þeirra er Donald Trump, forseti Bandaríkjanna. Hann hefur breytt um skoðun á málefnum Sýrlands en árið 2013 var hann einn helsti andstæðingur þess að Bandaríkin myndu grípa inn eftir efnavopnaárás Sýrlandshers.
Viðhorf Trump hefur breyst
Þegar Trump tók við embætti forseta hét hann því að bæta samband Bandaríkjanna við helsta bandamann Bashar Hafez al-Assad Sýrlandsforseta, Vladimír Pútín, forseta Rússlands. En nú hafa forsendur þess breyst og segir Trump árásina á Khan Sheikhun blett á mannkyninu. Að minnsta kosti 86 létust í árásinni og tugir liggja þungt haldnir eftir árásina.
Í gær voru birtar myndir af börnum þar sem þau sjást sárkvalin, froðan vellur út úr munnvikum þeirra og krampakippir fara um líkama þeirra allt þangað til þau kafna.Trump lýsti því yfir eftir að hafa séð myndirnar að árásir sem þessar verði ekki liðnar. Viðhorf hans til stríðsins í Sýrlandi hefði breyst eftir efnavopnaárásina á þriðjudag enda hafi hún farið út fyrir öll mörk.
„Þegar þú drepur saklaus börn, saklaus börn, kornabörn... þá fer það út fyrir öll mörk,“ varar Trump við. Hann segir að það hafi þegar gerst og viðhorf hans til Sýrlands og Assad hafi breyst mjög mikið. Enda sé verið að tala um eitthvað allt annað núna.
Trump fór ekki nánar út í viðbrögð bandarískra yfirvalda og til hvaða aðgerða verði gripið en hingað til hefur hann verið andstæðingur þess að Bandaríkin hæfu hernað í Sýrlandi.
Sýrlandsstjórn ber ábyrgð
Fulltrúi Bandaríkjanna í öryggisráði Sameinuðu þjóðanna, Nikki Haley, varar við því að ekki sé útilokað að Bandaríkin fari í einhliða aðgerðir gegn sýrlenskum yfirvöldum og utanríkisráðherra Bandaríkjanna, Rex Tillerson, hvetur Rússa til þess að endurskoða stuðning sinn við Assad. „Það er enginn vafi í mínum huga um að sýrlensk yfirvöld undir stjórn Bashar al-Assad beri ábyrgð á þessari hryllilegu árás,“ segir Tillerson.
Tillerson fer til Moskvu í næstu viku til viðræna við stjórnvöld þar í landi og er ljóst að þær viðræður verða undir skugga atburðanna í Khan Sheikhun.
Rússnesk yfirvöld hafa staðið fast á stuðningi sínum við Sýrlandsstjórn og í gær héldu þau því fram að loftárásir Sýrlandshers hefðu hæft vöruhús hryðjuverkamanna en þar hafi verið geymd efnavopn.Haley gefur lítið fyrir þessar skýringar og á fundi öryggisráðsins í New York í gær sagði hún að rússnesk yfirvöld endurtaki aftur og aftur lygi sína til þess að verja og beina athyglinni frá bandamönnum þeirra í Damaskus.
Getum ekki staðið hjá
Þegar hún er spurð að því hvort Bandaríkin grípi til einhliða aðgerða líkt og Trump ýjar sagði hún: „Þegar Sameinuðu þjóðirnar ítrekað standa ekki við skuldbindingar sínar þá geta komið upp þær aðstæður að við getum ekki staðið hjá og verðum að grípa sjálf til aðgerða.“
Líkt og áður neitar ríkisstjórn Sýrlands að hafa gert efnavopnaárás á bæinn íIdlib-héraði en þangað voru margir íbúar Aleppo fluttir eftir að samkomulag náðist um uppgjöf uppreisnarmanna í austurhluta borgarinnar.
Bæði Alþjóðaheilbrigðismálastofnunin (WHO) og samtökin Læknar án landamæra (MSF) segja að fórnarlömb árásarinnar beri merki þess að hafa orðið fyrir eitrun með taugagasi, líklega sarín.
Tengdar fréttir
Donald Trump Bandaríkjaforseti
Enn ein gönguljós á Hringbraut
Guðmundur um ræðuna: „Fall er fararheill“
Nokkrir með stöðu sakbornings
Setur viðmið um andlátsfréttir
Yfirgripsmikið mál en rannsókn miðar vel
Segir afstöðu ráðherra lýsa skilningsleysi