Erlent | mbl | 22.4.2017 | 13:40 | Uppfært 15:00

Skutu á allt sem hreyfðist

Árás sem talibanar stóðu fyrir á herstöð í Afganistan í gær er ein sú mannskæðasta sem afganski herinn hefur orðið fyrir í átökum við talibana. Ríflega 100 afganskir hermenn létust eða særðust í árásinni að sögn varnarmálaráðuneytisins þar í landi. Árásarmennirnir voru klæddir eins og hermenn.

Árásin átti sér stað skammt frá borginni Mazar-e-Sharif, sem er í Balkh-héraðinu í norðurhluta landsins. Bardagar stóðu yfir í nokkrar klukkustundir, en vopnaðir vígamenn réðust á hermenn sem höfðu nýlokið föstudagsbæn en einnig var ráðist á hermenn í mötuneyti hersins, að því er fram kemur í frétt BBC.

„Þegar ég gekk út úr moskunni hófu þrír menn í hermannafatnaði að skjóta og einnig var skotið úr herökutæki. Það er ljóst að þeir hafa notið aðstoðar einhverra í herstöðinni, því annars hefðu þeir aldrei komist inn,“ segir Mohammad Hussain, sem er afganskur hermaður sem særðist í árásinni.

Hussain segir enn fremur að einn árásarmannanna hafi verið með vélbyssu ofan á bifreið og skotið alla sem hann sá.

Frétt af mbl.is

Yfir 130 látnir í árás talibana

Upphaflega var talið að 134 hefðu fallið, en afganska varnarmálaráðuneytið segir hins vegar að rúmlega 100 hafi látist eða særst. Þá féllu að minnsta kosti 10 liðsmenn talibana í árásinni og einn var handsamaður.

Talibanar hafa sent frá sér yfirlýsingu þar sem þeir lýsa yfir ábyrgð. Þeir segjast hafa sent menn í sprengjuvestum á vettvang til að sprengja sér leið inn á svæðið.

Sem fyrr segir voru árásarmennirnir klæddir í einkennisfatnað afganska herliðsins og tókst þeim að aka í gegnum eftirlitsstöðvar áður en þeir gerðu loks árás, sem rennir stoðum undir það að árásarmennirnir hafi átt sér vitorðsmenn sem aðstoðuðu þá við að komast inn á svæðið.

Ashraf Ghani, forseti Afganistans, heimsótti svæðið í dag og ræddi við særða hermenn.

Fram kemur á vef BBC, að árásin sýni fram á að talibanar geti skipulagt og framkvæmt flóknar árásir. Fjórir árásarmannanna eru sagðir hafa þjónað í hernum í mörg ár og hafi þekkt herstöðina mjög vel.