Erlent | mbl | 8.6.2017 | 10:37 | Uppfært 11:55

Búist er við tíststormi frá Trump í dag

Þeir þrír einstaklingar sem málið snýst um. Trump, Comey og Flynn. AFP

James Comey, sem Donald Trump Bandaríkjaforseti rak úr starfi forstjóra alríkislögreglunnar FBI, mun mæta fyrir rannsóknarnefnd öldungadeildar Bandaríkjaþings klukkan 14 í dag. Þar kemur hann til með að lýsa samskiptum þeirra tveggja áður en Comey var látinn taka pokann sinn þann 9. maí síðastliðinn.

Fundinum verður lýst í beinni í útsendingu í fjölmiðlum vestanhafs og má búast við að Trump verði duglegur að tjá sig á Twitter meðan á honum stendur, líkt og hann er vanur. Fram kemur í frétt BBC að Washington bíði eftir tíststorminum.

Frétt af mbl.is

Vildi ekki vera einn með Trump

Upplifði óþægilegan þrýsting

Í vitnisburði Comey, sem lekið var á netið í gær, kemur fram að hann hafi skilið orð Trump þannig að hann krefðist þess að rannsókn á tengslum Michael Flynn, fyrrverandi þjóðaröryggisráðgjafa forsetans, við ráðamenn í Rússlandi, yrði hætt.

Comey segir jafnframt að forsetinn hafi hafi krafist hollustu af honum, hann þyrfti hollustu og byggist við henni, af hálfu forstjóra FBI. Það samtal átti sér stað í tveggja manna kvöldverðarboði í Hvíta húsinu þann 14. febrúar síðastliðinn. Í kjölfarið ritaði Comey minnisblað um samskipti þeirra, sem honum þóttu mjög óþægileg, að kemur fram í vitnisburðinum.

Vitnisburður Comey fyrir nefndinni er hluti af stærri rannsókn á vegum þings og dómsmálaráðuneytis á þeim möguleika að Rússar hafi haft einhver áhrif á niðurstöðu forsetakosninganna í nóvember síðastliðnum, með því að hakka sig inn í kosningakerfið. Að Rússar hafi þannig stuðlað að sigri Trump á frambjóðanda demókrata, Hillary Clinton. Þá er einnig rannsakað hvort opinberir starfsmenn í kosningabaráttu Trump hafi tekið þátt í slíku samsæri.

Hvíta húsið verst með kjafti og klóm

Svo virðist sem Hvíta húsið ætli sér að verjast vitnisburði Comey með tvennum hætti, að fram kemur í frétt BBC um málið.

Í staðinn fyrir að greina sérstaklega smáatriði í samskiptum forsetans og fyrrverandi forstjórans og hrekja þau, hefur lögmaður Trump bent á að þessi opinberum Comey veiti forsetanum einfaldlega upprein æru, enda megi skilja það á samtölunum að forsetinn sjálfur hafi aldrei verið til skoðunar vegna óeðlilegra tengsla við rússneska ráðamenn.

Frétt af mbl.is

„Vona að þú getir sleppt þessu“

Hin taktíkin er að mála Comey upp sem athyglissjúkan einstakling sem uni sér vel í kastljósi fjölmiðlanna, og sé í raun uppteknari að athyglinni en að þjóðaröryggi Bandaríkjanna.

Búast má við að vitnisburður Comey komi til með að varpa skugga á forsetann í einhvern tíma og því er líklegt að þessar gagnárásir af hálfu Hvíta hússins séu aðeins byrjunin á því sem koma skal í að reyna að sverta mannorð comey og upphefja Trump á hans kostnað.