Greina andlit á lestarstöðvum

Stjórnvöld í Þýskalandi hafa ákveðið að innleiða andlitsgreiningartækni á lestarstöð í Berlín í því skyni að hjálpað lögreglu að finna hryðjuverkamenn. Ef vel heppnast verður hún innleidd á fleiri stöðum og mun ná til fleiri glæpamanna.  

Thomas de Maiziere innanríkisráðherra sagði að tæknin verði prófuð á sjálfboðaliðum á Suedkreuz stöðinni og að gefist tilraunin vel verði hún innleidd á fleiri lestarstöðvum. 

„Við höfum nú þegar myndbandseftirlit á lestarstöðvum. En við höfum ekki getað sett mynd af hryðjuverkamanni í kerfi sem lætur okkur vita þegar hann kemur í mynd,“ sagði Maiziere í viðtali við dagblaðið Tagespiegel. „Reynist tæknin áreiðanleg ætti hún líka að vera notuð til að finna annars konar glæpamenn.“

Samkvæmt fréttaskýringu Tagespiegel er ekki líklegt að nýja kerfið verði fyrir lagalegri mótstöðu vegna þess að það yrði aðeins notað til að finna þá sem liggja undir grun. Þannig bryti það ekki á réttindum þeirra sem koma rannsókninni ekki við. 

Þýskaland hefur orðið fyrir nokkrum hryðjuverkaárásum frá síðasta sumri, meðal annars mannskæðri árás á jólamarkaði í Berlín árið 2016 þegar maður frá Túnis keyrði flutningabíl á mannfjölda og drap tólf manns. Maðurinn náði að flýja vettvang með strætisvagni, síðan lest en var að lokum skotinn til bana af lögreglunni í Mílanó. 

• 1 blogg um fréttina

Bloggað um fréttina

• Íslenska þjóðfylkingin: Gripið verður til æ betri varnarkerfa gegn óvinum þjóðfélagsins