Kona á þrítugsaldri ákærð fyrir barnsrán

Héraðssaksóknari hefur ákært konu á þrítugsaldri fyrir að hafa hvatt stúlku til að fara af heimili sínu, sótt hana á bíl og farið með hana í íbúð í Garðabæ og hvatt hana til áfengisneyslu í bílnum og í íbúðinni. Ákæran var þingfest fyrir Héraðsdómi Reykjaness í gær.

Meint brot eru talin varða við 193. gr. almennra hegningarlaga um barnsrán og 99. grein barnaverndarlaga sem kveður á um refsingu yfir þeim sem hvetur barn til lögbrota, lauslætis, áfengis- eða fíkniefnaneyslu eða leiði barnið með öðrum hætti á glapstigu.

RÚV greinir frá málinu og kemur fram í fréttinni að foreldrar stúlkunnar krefjist þess að konan greiði dóttur þeirra eina og hálfa milljón króna í miskabætur. 

• 1 blogg um fréttina

Bloggað um fréttina

• Jóhannes Ragnarsson: Garðabær á glapstigum: Álitsgjafi frú Ingveldur