„Svarta ekkjan“ játaði morðin

Sjötug japönsk kona, „svarta ekkjan“ svonefnda, hefur játað morðið á fjórða eiginmanni sínum. Réttarhöld yfir konunni standa nú yfir, en hún er grunuð um að hafa eitrað fyrir alls sex eiginmönnum sínum og unnustum með blásýru.

Konan, Chisako Kakehi, kom dómurum í opna skjöldu þegar hún játaði morðið í vikunni. „Ég var að bíða eftir réttri tímasetningu því ég vildi drepa hann af djúpu hatri,“ sagði Chisako Kakehi í samtali við Asahi-dagblaðið. Sagði hún hin morðin hafa snúist um peningamál.

Í dag sagði hún hins vegar fyrir dómi að hún myndi ekki eftir því sem hún sagði fyrr í vikunni. Er hún með heilabilun á fyrsta stigi, en hún hefur samt sem áður verið talin sakhæf. Ef hún verður fundin sek gæti hún hlotið dauðadóm. Hún virðist þó ekki kippa sér upp við það og sagði við dómara fyrr í vikunni: „Ég myndi glöð deyja ef þú gefur mér slík lyf núna.“

Kakehi hef­ur fengið einn millj­arð jena, rúm­an millj­arð króna, í bæt­ur úr trygg­ing­un­um í tengsl­um við and­lát eig­in­manna og ást­manna und­an­far­in tíu ár.

Svo virðist sem Kakehi teng­ist dauða sex manna hið minnsta á síðustu tveim­ur ára­tug­um. Flest­um þeirra kynnt­ist hún í gegn­um hjú­skap­armiðlan­ir en þar óskaði hún eft­ir eig­in­manni sem væri eignamaður en ætti eng­in börn.

Fljót­lega eft­ir að fjórði og síðasti eig­inmaður henn­ar, Isao Kakehi, lést í des­em­ber 2015 var hún byrjuð að leita að nýju fórn­ar­lambi. Sam­kvæmt fjöl­miðlum var lýs­ing henn­ar eft­ir­far­andi: Eldri maður sem býr einn. Ekki verra ef hann glím­ir við veik­indi.

Frétt af mbl.is

Vildi mann sem glímdi við veikindi

Frétt af mbl.is

Svört ekkja á ferðinni í Japan

• Blogga um frétt