Kemur Kelly reglu á starfsmannamál Hvíta hússins?
Setja bókamerki
John Kelly, sem Donald Trump Bandaríkjaforseti, tilkynnti nú fyrr í kvöld að hefði tekið við sem starfsmannastjóri Hvíta hússins, er fyrrverandi sjóliðsforingi. Frá því að Trump tók við embætti hefur Kelly gegnt embætti heimavarnarráðherra eftir 45 ára veru í hernum.
Kelly, sem er 67 ára, hefur orð á sér fyrir að vera lítið fyrir málalengingar og víst þykir að hann þurfi á seiglunni að halda í nýja starfinu þar sem hann á að koma reglu á þá óreiðu sem virðist vera á starfsmannamálum Hvíta hússins.
Trump tilkynnti á samskiptamiðlinum Twitter í kvöld að Kelly tæki við að Reince Priebus sem starfsmannastjóri Hvíta hússins og sagði hann vera „frábæran Bandaríkjamann“ og „frábæran leiðtoga“.
Úr íslömskum öfgamönnum í pólitískt baktjaldamakk
Kelly mun þar með fara frá því að leiða baráttuna gegn íslömskum öfgamönnum og ólöglegum innflytjendum yfir í að reka Hvíta húsið, sem undanfarið hefur verið í skugga upplýsingaleka og pólitísks baktjaldamakks vegna ásakana um tengsl framboðs forsetans við ráðamenn í Rússlandi.
AFP segir Kelly vera einn af nokkrum háttsettum liðsmönnum Trump-stjórnarinnar sem eigi að baki feril í hernum. Hann kom m.a. að landamæramálum, straumi hælisleitenda og aðgerðum gegn fíkniefnasmygli á Kyrrahafi og í Rómönsku-Ameríku í starfi sínu í hernum. Sú reynsla kom honum vel sem heimavarnaráðherra, þar sem landamæraeftirlit og innanlandsöryggi voru meðal helstu verkefna.
Fyrir vikið var Kelly líka mikilvægur liður í þeim kosningaloforðum Trumps að reisa múr á landamærum Bandaríkjanna og Mexíkó, að senda óskráða innflytjendur úr landi og herða vegabréfaeftirlit í leit að íslömskum öfgasinnum.
Missti son sinn í bardaga
AFP segir Kelly líka vera náinn Jim Mattis, varnarmálaráðherra Bandaríkjanna. Var hann raunar nánasti aðstoðarmaður Mattis í Írakstríðinu, í árásinni á Bagdad árið 2003.
Sú reynsla að hafa misst son sinn í bardaga er líka sögð hafa mótað hann, en Robert Michael Kelly sem einnig var í sjóhernum lést í bardaga í Afganistan 2010.
Kelly er borinn og barnfæddur Bostonbúi og skráði sig í herinn þegar hann var tvítugur. Hann var tvö ár fótgönguliði, en yfirgaf þá herinn og fór í háskóla.
Reis hratt upp metorðastigann
Eftir að hann útskrifaðist skráði hann sig í herinn á ný og reis nú hratt upp metorðastigann. Hann var m.a. sérstakur tengiliður sjóhersins við Bandaríkjaþing á tíundaáratug síðustu aldar og var um tíma sérstakur aðstoðarmaður yfirmanns Bandaríkjahers í Evrópu.
Kelly tók þátt í Íraksstríðinu líkt og áður sagði, þar sem hann þjónaði undir Mattis og áður en hann fór á eftirlaun í janúar í fyrra hafði hann hlotið fjórar stjörnur.
Joe Manchin, öldungadeildaþingmaður demókrata, sagði í viðtali á CNN í kvöld að Kelly væri vel liðinn af báðum flokkum. Spurður hvort hann væri rétti maðurinn til að koma reglu á starfsmannamál Hvíta hússins svaraði hann: „Ef hershöfðingi getur það ekki, þá veit ég ekki hver getur það. Hann mun ekki sætta sig við neina vitleysu.“
„Ef við tímasetjum ekki samskiptin þá gerist ekki neitt“
Silja Bára næsti rektor Háskóla Íslands
„Ísland er ekki herlaust land“
Lykt staðfest af neysluvatni og lækkað ph-gildi
„Mjög skýrt að Evrópa mun ekki bakka“
„Mjög sátt og í takti við það sem við reiknuðum með“
Blaðamenn verjast árásum