Erlent | mbl | 9.8.2017 | 14:35

Níddust á hópi ungra stúlkna

Sautján karlmenn og ein kona hafa verið dæmd fyrir að níðast á ungum konum og stúlkum í Newcastle. Mynd/Lögreglan í Northumbria

Sautján karlmenn og ein kona hafa verið dæmd fyrir að níðast á hópi ungra stúlkna í Newcastle. Fólkið gaf stúlkunum áfengi og eiturlyf og þvingaði þær svo til kynmaka.

Yngsta fórnarlambið er fjórtán ára. Stúlkurnar hafa allar átt erfitt uppdráttar áður og að minnsta kosti einni hafði verið komið fyrir hjá fósturfjölskyldu.

Um fjögur aðskilin réttarhöld var að ræða og í frétt BBC segir að sumir úr hópnum hafi viðurkennt brot sín. Fólkið var m.a. ákært fyrir nauðgun og að hafa boðið ólögráða stúlkunum fíkniefni. Þá var einnig ákært fyrir vændissölu.

Við rannsókn málsins greiddi lögreglan m.a. manni sem dæmdur hafði verið fyrir barnaníð 10 þúsund pund, um 1,3 milljónir króna, fyrir upplýsingar.

Þrír hinna dæmdu hafa þegar verið settir í fangelsi en refsing hinna verður ákveðin í næsta mánuði, segir í frétt BBC.

Lögreglan hóf að rannsaka málið árið 2013 er ábendingar bárust um kynferðislega misnotkun á stúlkum í borginni. Rannsóknin vatt upp á sig og teygði að lokum anga sína víða. Meðal þess sem lögreglan komst á snoðir um voru brot hóps karlmanna í West End í Newcastle sem misnotuðu stúlkur í viðkvæmri stöðu á árabilinu 2010-2014.

Að lokum var ákært og réttað í fjórum aðskildum málum. Dæmt var í því fyrsta í fyrra og því síðasta í dag. Þar með mátti aflétta fréttabanni á málunum í heild sinni, segir í frétt BBC.