Borga ekki „undir nokkrum kringumstæðum“
Setja bókamerki
Stjórnvöld í Mexíkó ítrekuðu á sunnudag þá afstöðu sína að Mexíkó muni ekki borga fyrir múrinn sem Donald Trump Bandaríkjaforseti hyggst koma upp á landamærum ríkjanna að því er fréttastofa CNN greinir frá.
Trump tjáði sig á Twitter í gærmorgun líkt og svo oft áður. „Þar sem Mexíkó er ein þeirra þjóða heims sem er með hvað hæsta glæpatíðni þá verðum við að fá MÚRINN. Mexíkó mun greiða fyrir hann í gegnum endurgreiðslur/annað,“ sagði í tísti forsetans.
Utanríkisráðuneyti Mexíkó brást við tísti forsetans með því að ítreka að Mexíkó muni ekki greiða fyrir múr eða aðrar efnislegar hindranir á landamærunum „undir nokkrum kringumstæðum“.
„Þessi staðfesta er ekki hluti af samningatækni Mexíkóa, heldur grundvallaratriði þjóðlegs sjálfstæðis og virðingar,“ sagði í yfirlýsingunni. Glæpatíðnin væri þá vandi sem þjóðirnar deildu og sem væri að hluta til komin vegna eftirspurnar Bandaríkjamanna eftir fíkniefnum frá Mexíkó.
Eitt af helstu kosningaloforðum Trumps fyrir forsetakosningarnar var að reisa múr á landamærum ríkjanna og að láta Mexíkó borga múrinn. Eftir að hann tók við embætti hefur Trump krafist þess að þingið finni fé fyrir múrframkvæmdina og finni leið til að láta yfirvöld í Mexíkó greiða Bandaríkjunum hana til baka.
Ráðamenn í Mexíkó hafa alfarið hafnað slíkum hugmyndum.
Björgunarsveitir kallaðar út í nótt
Munir í geymslum og rýmið autt
Evrópa gæti tapað í kapphlaupinu
Álíta Ísland ekki umsóknarríki
Fólk á fleiri en 30 bifreiðum þurfti aðstoð
Fór 300 ferðir upp Esjuna á árinu
Valkyrjur koma og fara
Sendi frá sér neyðarboð skömmu fyrir flugslysið