Hersveitir Tyrkja ráðast inn í Sýrland

Tyrkneski herinn hefur ráðist inn í norðurhluta Sýrlands. Markmiðið er, að sögn Erdogans Tyrklandsforseta, að losna við hersveitir Kúrda af um 30 km löngum landsvæði á mörkum Sýrlands og Tyrklands. Hernaðurinn beinist gegn Verndarsveitum Kúrda (YPG) sem Tyrkir segja hryðjuverkasamtök.

Tyrkneskar hersveitir hafa þegar komist um 5 kílómetra inn á sýrlenskt landsvæði, að því er fram kemur hjá Anadolu, ríkismiðli Tyrkja. Talsmaður YPG, Norui Mahmoudi, segir þó að hópurinn hafi síðan náð að hrekja á brott tyrkneskar hersveitir og muni þær neyðast til að hörfa.

Talið er að um 25.000 hermenn Frelsishers Sýrlands taki þátt í átökunum við hlið tyrkneska hersins. Erdogan hefur heitið því að gera út af við hersveitir Kúrda í Sýrlandi, sem og Verkamannaflokk Kúrda (PKK) sem hann segir í slagtogi við YPG, en Verkamannaflokkur Kúrda er ólöglegur í Tyrklandi.

Mannfall er á báða bóga. Verndarsveitir Kúrda hafa sagt að fjórir tyrkneskir hermenn hið minnsta hafi látist í bardögum í dag og tíu sýrlenskir uppreisnarmenn hliðhollir Tyrkjum sömuleiðis. Kúrdarnir halda því einnig fram að átta almennir borgarar hafi farist í loftárás Tyrkja á kjúklingabýli í þorpinu Jalbara í dag. Stjórnvöld í Tyrklandi halda því hins vegar fram að hinir látnu hafi allir verið hermenn.

Frétt af mbl.is

Vonast til þess að hernað taki fljótt af

Hernaðaraðgerðir Tyrkja hafa mælst illa fyrir hjá bandalagsþjóðum þeirra í NATO, þar á meðal Bandaríkjamönnum og Frökkum, en Bandaríkjastjórn lítur á YPG sem mikilvægan bandamann í baráttunni gegn Íslamska ríkinu. Óttast er að árásir Tyrkja verði til þess að stríðið í Sýrlandi dragist enn frekar á langinn en í mars eru sjö ár liðin frá því mótmælin gegn forseta landsins hófust.

Fjöldi kom saman í nokkrum borgum í Tyrklandi til að mótmæla áformum forsetans, sem sigaði lögreglunni á mótmælendur. Hann hefur boðað að öll mótmæli verði tekin föstum tökum.

• 1 blogg um fréttina

Bloggað um fréttina

• Páll Vilhjálmsson: Tyrkland eða Kúrdistan