Erlent | mbl | 12.6.2018 | 1:27 | Uppfært 2:23

Trump og Kim takast í hendur

Kim Jong-un og Donald Trump takast í hendur í Singapúr AFP

Donald Trump, forseti Bandaríkjanna, og Kim Jong-un, leiðtogi Norður-Kóreu, hittust í Singapúr klukkan rúmlega eitt í nótt að íslenskum tíma. Vel fór á með Trump og Kim þegar þeir hittust fyrst og tókust í hendur og að því búnu fóru þeir yfir í fundarsal og var létt yfir þeim á leiðinni. Þegar þangað var komið settust þeir fyrir framan blaðamenn og ljósmyndara og svöruðu spurningum stuttlega, tókust aftur í hendur og voru kampakátir.

Að þessu loknu viku fulltrúar fjölmiðla úr fundarsalnum og ætlunin var að á fyrsta hluta fundar Trumps og Kims yrðu engir nema þeir tveir, ásamt túlkum. Erlendir miðlar fjölluðu mikið um fundinn og fylgdust með aðdraganda hans, þar með talið bílalestum á leið á fundarstað, og augljóst var að spenna ríkti. Talað hefur verið um að fundurinn sé þegar orðinn sögulegur, enda hafi forseti Bandaríkjanna aldrei fyrr hitt leiðtoga Norður-Kóreu, og Trump og Kim hafa þar til nýlega deilt harkalega. Óvíst er þó um niðurstöðu fundarins eða árangur af honum.

Á sjónvarpsstöðinni Fox var rætt um að þessi fundur væri ef til vill mikilvægasti leiðtogafundur sem haldinn hefði verið frá því að Gorbatsjov, leiðtogi Sovétríkjanna, og Reagan, forseti Bandaríkjanna, hittust í Reykjavík, í Höfða, og ræddu afvopnun. Sá fundur hafi ekki skilað miklu, en þó hafi hann átt þátt í að mál þróuðust áfram og nokkrum árum síðar hafi Sovétríkin og járntjaldið fallið.