Erlent | AFP | 14.6.2018 | 7:28 | Uppfært 20:06

Flögguðu nasistafána í Afganistan

Skjáskot

Hermenn frá Ástralíu flögguðu nasistafána á farartæki sínu í hernaðaraðgerð í Afganistan árið 2007. Þetta sést á ljósmynd sem birt hefur verið og kallað á hörð viðbrögð. Forsætisráðherra Ástralíu, Malcolm Turnbull, hefur sagt notkun áströlsku hermannanna á nasistafánanum fullkomlega óásættanlega.

Fram kemur í frétt AFP að sjónvarpsstöðin ABC hafi birt myndina. Hefur hún eftir heimildarmanni hjá ástralska varnarmálaráðuneytinu að um hafi verið að ræða „sjúkan brandara“ frekar en vísbendingu um að viðkomandi hermenn aðhylltust nasisma. Að sögn Turnbulls vissu stjórnvöld af málinu 2007 og var hlutaðeigandi refsað vegna þess.

Samkvæmt heimildum ABC var fánanum aðeins flaggað í stutta stund þar til yfirmenn sáu til þess að hann væri tekinn niður og hermönnunum refsað. Fáninn hafi síðar verið eyðilagður. Farið hafi enn fremur verið yfir alvarleika málsins með þeim hermönnum sem verið hafi á staðnum.