Tugþúsundir mótmæla Trump
Setja bókamerki
Donald Trump Bandaríkjaforseti fékk ekki sérlega góðar móttökur frá íbúum Lundúnaborgar, en hann er þar staddur vegna viðræða við Theresu May, forsætisráðherra Bretlands. Gríðarstórri „barna Trump“-blöðru var fyrr í dag flogið yfir þinghús Breta en umdeildri heimsókn forsetans er mótmælt víða um Bretland í dag.
Appelsínugul blaðran tók á loft um klukkan hálf tíu á staðartíma í morgun. Maðurinn sem stendur fyrir blöðrunni, Leo Murray, sagði í samtali við CNN að blaðran var til þess gerð að ná til Trump á „tungumáli sem hann skilur, það er persónulegar árásir.“ Þá segir Murray að þótt sumir hafi efasemdir um að gera Bandaríkjaforseta að athlægi, hafi stefna Trump á forsetatíð hans skapað andrúmsloft þar sem „venjulegar diplómatískar venjur eigi ekki lengur við.“
Flug blöðrunnar var samþykkt af borgarstjóra Lundúna, Sadiq Khan, fyrr í mánuðinum. Kalt er á milli Trump og Khan en borgarstjórinn tók opinbera afstöðu gegn komu forsetans til Bretlands.
Mótmælendur komu saman snemma í morgun til þess að fylgjast með blöðrunni hefja flug sitt en heimsókn Trump til Bretlands hefur valdið mikilli reiði í landinu. Bæði á meðal íbúa sem og breskra stjórnmálamanna. Forsetinn hætti við fyrirhugaða ferð sína til Lundúna fyrr á árinu vegna ótta um mótmæli.
Heimsókn Trump hefur því verið vandlega skipulögð þannig að hægt verið að forðast mótmælin en samkvæmt CNN hefur honum þó borist veður af blöðrunni frægu. Á blaðamannafundi í Brussel í gær í kjölfar leiðtogafundar NATO sagðist Trump ekki hafa áhyggjur af mótmælum við komu hans. „Ég held að þeim líki vel við mig í Bretlandi… þess vegna gerðist Brexit.“
Viðræður Trump og May fara fram fyrir utan borgina á sveitasetri May. Fundur forstans við Elísabetu Englandsdrottningu mun einnig fara fram fyrir utan miðborgina, í Windsor-kastala.
Skoða ráðstafanir vegna mikillar kuldaspár
Ekkert ferðaveður og vegalokanir á jóladag
Éljagangur en síðan slydda eða rigning
Býst við meiri aðsókn í janúar
Spá 13-18 stiga frosti í borginni
Taka upp grímuskyldu á Landspítalanum
Búið að opna Hellisheiði
Sex fluttir með þyrlunni og þar af eitt barn