Bless skinkusamloka, halló borgaratvenna
Setja bókamerki
Hvað verður um 99 dollara flugin, hjónabandserfiðleikar og vetrarkoma í anda Game of Thrones eru meðal þeirra samlíkinga sem erlendir fjölmiðlar koma með í umfjöllun sinni um kaup Icelandair á WOW air í gær.
Vetrarkoman er Forbes ofarlega í huga og segir í ítarlegri frétt miðilsins að veturinn sé nú kominn hjá öðru „norrænu“ flugfélagi. Þá eru rifjuð upp nokkur þeirra lággjaldaflugfélaga sem horfið hafa af markaði undanfarið, m.a. Monarch, Air Berlin og SkyWork.
Forbes segir líka að þrátt fyrir þau orð Icelandair að kaupin á WOW air séu gerð með það í huga að styrkja stöðu flugfélaganna, sé slík sameining ekki vandkvæðalaus. Flugfélögin séu til að mynda með mjög ólík viðskiptamódel og með sitthvora flugvélategundina sem feli í sér að til að byrja með a.m.k. muni hvorki flugmenn né flugvirkjar geta flakkað milli flugfélaganna.
Hvað verður um 99 dollara miðana?
Fyrirsögn Business Insider um samrunann er hins vegar: „Flugfélagið sem er þekktast fyrir 55 dollara flug frá Bandaríkjunum til Evrópu hefur verið keypt af helsta keppinaut sínum“, og hjá ferðavefnum Condé Nast velta menn því fyrir sér hvað verði um 99 dollara flugferðirnar til Reykjavíkur. Með minnkandi samkeppni verði erfiðara að finna ódýru miðana. Góðu fréttirnar séu hins vegar þær að þjónustan hjá lággjaldaflugfélaginu hljóti að batna. „Bless aumkunarlega skinkusamloka og halló borgaratvenna,“ segir í frétt Condé Nast.
Bloomberg líkir kaupunum þá við hjónaband og Washington Post bendir á að bæði félögin hafi undanfarin misseri glímt við fjárhagserfiðleika. CNBC kastar þá í sinni umfjöllun um kaupin fram þeirri spurningu hvort að hækkandi olíuverð og hækkandi farmiðaverð sem því fylgi muni leiða til fleiri sambærilegra sameininga.
Dómur þyngdur um þrjú ár
Drónamyndskeið frá hápunkti gossins í nótt
Reiðubúin að aflýsa verkföllum í fjórum leikskólum
Viðræður ekkert þokast frá því á þriðjudag
Yfir 300 stæði fóru undir hraun
„Höfum sloppið bærilega með skaða af þessu gosi“