Facebook lokaði á sjö einstaklinga fyrr í vikunni og vísaði í stefnu samfélagsmiðilsins um að loka á hættulega einstaklinga og samtök. Donald Trump, forseti Bandaríkjanna, stendur með þeim sem eru útilokaðir á Facebook og kvartar sáran yfir ritskoðun á samfélagsmiðlum á Twitter að sjálfsögðu enda hans eftirlætis samfélagsmiðill.

Forsetinn deildi á annan tug færslna á föstudagskvöldið og í morgun um málið. Samkvæmt frétt CNN minnist hann ekki á að sumir þeirra eru þekktir öfgamenn sem þykja hættulegir. 

Meðal þeirra sem voru bannaðir á Facebook eru Louis Farrakhan, leiðtoga Nation of Islam, en hann er þekktur fyrir hatursorðræðu í garð gyðinga. Alex Jones, öfgamanns sem þekktur er fyrir samsæriskenningar  auk fleiri öfgamanna. Má þar nefna Paul Nehlen, Milo Yiannopoulos, Paul Joseph Watson og Laura Loomer. Þetta er ekki í fyrsta skipti sem lokað er á Jones og eins fjölmiðlavef hans InfoWars á Facebook. Nú var lokað á Jones og InfoWars á Instagram sem er í eigu Facebook.